令人懷念的中秋

又到中秋節了，呢個日子對於已經移居美國十幾年既我，其實感覺並不大。三藩市呢邊有唐人埠，中秋節會有擺街會，大多係賣月餅雜貨等攤位，同香港過中秋既花燈會完全唔同，無花燈睇，可以話係完全無氣氛。

每年呢個時候，我都會好懷念中學約同學去玩蠟燭既時光。細個媽咪唔比出夜街，中秋節就係最好既夜行時機！果晚團圓一定要響屋企食飯，定必神速爬飯然後衝出門口會友！因為12點前要做灰姑娘啦嘛！哈！印象最深刻，係響官塘月華街巴士站隔離既公園，滿地蠟燭，成個公園都閃住火光，好靚！我地一班朋友坐響度傾計講笑，食月餅飲維他奶，真係好開心！果時法例仲未係咁嚴格，可以隨街玩蠟燭，而家應該唔會再有呢種場面了。

又記得10 年前，果年隻身返左香港做野，好朋友買左一盒冰皮月餅比我過節之餘，仲同我去行燈會，食大餐慶祝中秋。果次都算係過去10 年最有氣氛既一次。之後返番黎美國，亦再無真正‘過中秋’呢個感覺了。自此每年中秋，我都會買兩個迷你冰皮月餅，自己食左佢，就當係尋回果一年既回憶吧，哈哈！

而近兩年既中秋，都有香港朋友寄吹氣燈籠比呔仔細細，等我地中秋當晚可以比佢地拎住燈籠出街行個圈，當應下節，我地亦有話比兩個仔聽關於中秋呢個節日。今年仲有朋友寄來手造奶黃月餅，shemom 亦送上MoonCookie，真係好窩心呀！特別我地呢D 人在異鄉，能夠感受到自己節日既機會唔多，所以每次收到朋友對我地既心意，感受特別深！

響呢度，祝各位shemom 既讀者，我班朋友卜友:中秋節快樂！人月兩團圓！