【夏遊關西】竟然咁少人知 大阪平靚正的地方(下集)

上集介紹左「阿倍野地震防災館」 同 「大阪市立自然史博物館」,今次介紹「大阪市立科學館」(地下鐵: 肥後橋站),又係我地岩岩去完覺得好正的!呢個我地星期日去,都好多人呀,本地人同遊客都多。展覽廳入場費平,大人400 yen,中學生以下又係免費。

場館超大!分4層,由4樓宇宙天文學,磁性原理等,一直落樓下3樓係化學物質,礦物。2樓開始比人接觸科學,好多野玩同體驗,而1樓係電子原理,又係好多玩意,岩晒好動小朋友。

129b

129c

129d

129e

慢慢行會花好多時間去睇,當然睇你對科學有幾大興趣,普通走轉都花1個半至兩個鐘的。另外,展示廳旁有個影視廳,分開比錢入場的。見佢唔同時間播唔同映畫,關於星空宇宙,都好吸引,老公好想入場睇花火,可惜之後都無時間。大家有興趣可以去佢網頁睇下有咩岩睇 (http://www.sci-museum.jp/),預番時間。

 

另一個大人細路都好岩去既新地方,位於「萬博紀念公園站 EXPO City 」地下鐵:千里中央站 > 轉單軌列車2個站到「萬博紀念公園站 EXPO City」,佢係一個娛樂購物城,入面有 Nifrel 水族動物館、Pokemon Gym、 戲院,同埋勁勁勁大Mall,噢!仲有靚靚摩天輪,我地之前去都未有得玩,而家有喇!

我地去左「Nifrel 水族動物館」,大人1900 yen  / 初中小學1000 yen /3 歲以上幼兒600 yen。入面分3區,水族、大星球、動物。佢同一般水族館或者動物園唔同,好岩大人慢慢欣賞,小朋友都開心,同時又可教佢地耐心欣賞藝術。入面你會睇到佢係好用心咁去安排每樣野,充滿藝術味道。水族生物好靚好特別,種類唔係常見的,feel 到係精心挑選,連燈光顏色都襯埋,成件事好靚!

130h

130i

130d

130b

之後有個不斷變幻既大星球,享受入面寧靜星空個feel真係好正!小朋友都興奮!!

130l

最後有動物,唔係多,但全部靚仔!有個場館係幾款動物四圍行,但不可以靠太近的,即係唔比摸。之後我地去左行Mall ,好大好多品牌,而最驚喜係頂樓Food Court, 有「利久牛舌」、「北極星蛋包飯」、「一風堂拉麵」等,一D 都唔hea !醫肚後過隔離夾公仔又夾到喎!你知好多機舖個夾鬆架嘛,我地果晚好容易夾左2個大叮噹,勁開心呀!!

總括呢個價錢入場覺得非常值得,又整得咁靚咁有心,要支持下!