放縱與疼惜 一線之差

記得初初寫Shemom時,其中有一篇文章係講我自己,自知非常心急,忍唔住小朋友會慢手慢腳呀,拖拖拉拉阻時間之類既事,會忍唔住快快手手幫佢地搞左佢。但咁樣其實對小朋友唔好,會阻礙左佢地學習自理同養懶佢地,我當時諗,要好好改善心急性格。兩年間,我發現其實我唔係好做得到,人地話江山易改,本性難移,係真!當時有提及過,縱仔同錫仔,其實只係一線之差。縱,你係幫佢手做晒佢要做既野,而錫,係你用心教佢點做,等佢自己去做,有機會學習自立,長大後面對唔同既事情可以更堅強。

 

shutterstock_353917520-1

近排我老公開始經常出聲,叫停我,要比兩個仔自己去攪,我就發現,有好多位我無控制自己既心急。可能兩年前佢地細個D,我幫手做野唔係咁顯眼,而家7,8歲仔,真係大個仔了,D野我出手做就好覺眼,係時候好好面對呢個問題了!

shutterstock_226681282

其實好多野佢地都係自己做,我地對佢地都有一定要求。我覺得啦,佢地自理能力完全無問題,特別是細細,佢本性好獨立,好多野都鐘意自己打理返。係呔仔會比教依賴我,而且佢係特別慢手慢腳,所以佢既野我會成日出手,實在係太睇唔過眼!於是老公落左order,特別是呔仔,要嚴格訓練佢,同埋專登比多D 野佢負責,增加返個責任感。

shutterstock_319767422

 

之前佢講我都唔覺,之後發現,這些湊仔年來,我已經變成本能反應地一聽到要求就會即刻做,真係幾有問題。例如出街食飯,老公叫呔仔拎杯水比佢,我就好自然會即刻拎左,老公叫停,係叫呔仔拎唔係叫我,我先醒覺。又或者同呔仔行街佢會一直痴實我,老公又會要佢自己去睇佢鐘意既野,因為佢太習慣我響佢身邊跟出跟入,唔太獨立,所以又要訓練。有時自己會睇唔到自己問題,當局者迷丫嘛,好彩身邊的人可以互相提醒!希望黎緊對呔仔細細既訓練可以令佢地成長,而我自己都有一個戒掉心急既轉變吧!