帶著男孩上女廁?

早排,香港某商場響廁所門外貼左告示 「請勿帶同5歲以上之異性小童進入」,隨即引黎大批網友同家長們熱烈討論!有人覺得5歲小孩,應該已懂自己如廁,可以獨自去廁所,叫家長們唔好過份保護,應教佢地自保,免得變了怪獸家長。又有大批家長們認為5歲小孩其實仲好細個,就算識去廁所,但遇上壞人根本無力反抗,基於問題,唔會比小朋友自己去廁所。

1

我自己有兩個仔,7歲同8歲,在我而言,跟唔跟我入女廁呢件事係好地區性,亦到好睇當時環境。先討論香港地區,5歲黎講就實在係好危險的!由於近年香港真係太混亂,小朋友問題令父母們非常緊張,唔好講話由佢一個人入廁所,父母睇唔到又跟唔到,就連拖少一陣都驚會比人抱走既,你話父母點可放心比5歲小朋友自己去廁所呢? 呢個唔係佢地自理能力問題,如環境的話,邊個願意跟出跟入睇細路? 一早推左佢地自己搞掂了。

響美國呢邊,之前亦有商場貼左告示: “Please let Boys over 6 years of age to use Men’s restroom” 同樣引起各媽媽 group 熱烈討論。論點同香港既父母一樣,唔係驚個細路唔識去廁所亂咁痾,唔係驚佢唔沖廁唔洗手,而係驚佢遇到變態佬比人搞,然而,呢D案件時時發生,係絕對值得我地做父母擔心的!

*紐約市一名6歲幼童在學校旅行時,於公廁被22歲男人摸下體,當時母親在廁外等待。

*加洲柏克利市一名6歲男童在公廁被人性侵犯,其家人在外等待。

*紐約市一名7歲女童如廁時,被一名一早躲藏於女廁格的男子性侵犯,其父親與兄弟在廁外等待。

shutterstock_388063147

咁究竟幾多歲先適合比佢地自己去廁所呢?

唔可以跟到10歲都仲入異性廁所架嘛...我自己覺得,小朋友大約7,8歲,返左兩年小學,有基本自保能力,識得提妨壞人,醒醒目目唔係傻更更咁,就可以自己去廁所喇!我兩個仔都係剛剛開始自己去廁所 (只我一人帶佢地時),但並唔係真係由得佢自己去唔理佢喎,我比較幸運,兩個仔多數一齊去廁所的,咁樣已經可以互相保護,免卻一個仔入廁所既不安。而我雖然響出面,仍然會問入去: 問佢地搞成點? 提佢地洗手等,要佢地應我,目的係比入面既人知道小朋友有大人吼住!唔好亂黎!!

2

另外,就係要keep小朋友有回應,唔好無左聲,因為一分鐘都可以比人性侵犯。

以下係我睇美國媽媽 group,佢地建議小朋友入廁所時父母們可做既事,大家可參考下。

 

1)最好有親友陪同小朋友入廁所,千祈唔好接受陌生人幫助,特別是佢剛去完廁所行出黎話幫你睇細路的陌生人。

2)男仔去廁所唔好用尿兜,JJ 不能外露,要教小朋友入廁所鎖門先開始去廁所。響廁所唔好同陌生人講野!

3)唔好去有兩個或以上出口既廁所,盡量去 D 較細,少廁格的。同時父母們要打量每個進入廁所既人,同佢地有眼神接觸。意思係: 我認得你!

4)在門外與廁所入面小童對話。問題可以係: 入面有無陌生人呀? 記得我地唔同陌生人講野架!要唔要幫手? 有無洗手呀? 唧唔唧到洗手液?

untitled-4

做父母的千祈唔好怕醜怕尷尬,保護小朋友係我地既責任!呢D問題,永遠做多唔做少,呢個係我保護小朋友既原則。就算其他大人聽到,都只會欣賞你係個負責任既家長,而唔係靠響門口篤手機的一群。