從小聽道理

11203045_947372375285767_9064312677313323461_n

 

呔仔細細嘅出現,令我呢一個由細到大都唔講嘅人,變成而家日日將一堆一堆做人嘅掛響嘴邊。原因係咩? 因我好清楚任性係會令人撞好多板,我嘅人生係不停撞撞撞,所有要明白嘅事理都係自己撞返黎。當然,小朋友總有佢自己要經歷嘅人生,但做父母既,行過邊 D 曲折路,可以嘅話梗想佢避開下嘛!再講,教得佢懂事,最直接受惠嘅係自己,你嘅湊仔生涯會輕鬆好多,又開心好多。

 

好多人以為,小朋友細細個唔明大人講咩,所以唔使同佢地講。錯喇!其實佢地完全明白,心水清過你同我!係未識講野咋,其實一早已經用行動表達你知,佢地咩都明。佢肚餓痾左尿識喊識唔開心,你引佢佢識笑識開心,佢知佢你會抱佢,證明佢開始明白 cause and effect,而「講」呢樣野,根本就係 cause and effect。所以,由佢地開始對事物有反應,已經可以同佢地講架喇!當然,唔係講 D 好深奧好長篇大論嘅野,而係用返佢認知嘅事物去解釋,容易淺白。

 

早在呔仔細細一歲左右,我已經係不停講,每樣野都解釋再解釋,用簡單嘅例子、事件去分析個嚴重性比佢地聽。唔好諗住講一次會明,如果講十次佢真係明白,已經偷笑了。第十一次,佢開始唔做同一樣野,又或者你一提佢就醒水,你就知道你果十次口水無白費了。(然後,我深深明白,點解每個阿媽都咁長氣!XD) 我深信好多野係在於基礎,個底打得好,以後教仔就輕易得多。

 

舉2個朋友們曾經問過我嘅例子:

 

1) 輕鬆帶佢地搭飛機。即使別人認為講極唔明,最難攪嘅2、3歲年紀,我可以一拖二帶佢兩個搭十幾個鐘返香港,完全唔扭唔嘈,仲幾 enjoy。點解唔呢?唔係佢地天生乖巧,幾乖嘅小朋友你唔比心機教或者用錯教法,一樣變壞。佢乖佢聽你支笛,其實係你付出左自己唔知,或者已經身教了。所有你見到嘅「果」都係你自己種嘅「因」。講返先,搭飛機係件大眾事,機上咁多人要休息唔係得你一個,又扭又嘈又坐唔定就會影響到人,將心比己,你休息時又鍾意被人嘈嗎? 只顧自己而妨礙別人嘅話叫自私,呢 D ,就係要靠從小講起喇,唔係搭飛機果十零個鐘佢會忽然明白的。

 

2) 唔扭買玩具。基本上每一次去 Toy Shop 都係睇玩具,而睇玩具亦已成為佢地嘅娛樂之一。佢地好明白除非特別日子或外遊,否則唔會無啦啦買玩具。見過好多小朋友扭買玩具喊,一喊父母就話買啦買啦,一唔係就搵其他野引佢,情願買糖買雪糕,再唔係就抱起夾佢走。其實好應該趁呢 D 機會講,正正經經講,講幾多次都要講,解釋比佢聽點解唔買,父母搵錢辛苦呀,買呢件玩具大人要做幾多個鐘頭工作,又或者舉例講買呢件玩具嘅錢,可以有咩其他更有意義嘅用途等等,比佢知道 D 錢唔買玩具,可以儲起佢更好地運用。

 

我地屋企有個規矩,就係呀喊呀永遠唔會得到你想要嘅野!反之,你只會得到懲罰 (要收效就要企硬了,唔好有一次係佢你心軟,比佢扭到,個規矩就無力架喇!) 久而久之,呔仔細細習慣左唔會用去要求,佢地會正常問。當佢要求時,你合理地解釋 (即拒絕啦),佢地會明白會同意你講嘅野。即使下次再要求,當我話我講過點解唔買時,佢地會記得,識講返個原因出黎架,咁樣已經係明白嘅表現,不過問多句又無壞既,搏下我會話可以買丫嘛!哈哈!

 

總之唔好嫌自己煩,不停講不停教,始終一天佢會變成一個懂事嘅小朋友架,飲多兩杯水,加油講啦!!