唔係點唧??

呔仔快7歲,細細快6歲,我仍當自己係新手媽媽,因為佢地每日長大,我要面對既係唔同年歲既佢地。我真係未湊過7歲小朋友,都在努力學習中,哈哈!在7年湊仔過程當中,最大挑戰應該係佢地3幾歲時食飯誓願既階段,真係餐餐食你2粒鐘。唔緊要,人總會長大,唔會10歲仲係食2粒鐘飯既!呢D都係一個階段既煩腦,反而性格上既教導會係重點。

 

12191926_10153237988716586_1655957744808264693_n

 

 

由我一個無咩規矩既人黎教仔,可能我驚自己好似我媽咪咁第時受返晒,所以教仔既野我執得好正架!希望同呔細好似好朋友咁相處既同時,佢地係識得尊重大人,知道小朋友要聽大人說話。平時我地每樣野都會比選擇佢地,唔會命令式要佢地咁就咁,當然佢地可選擇既都係我地揀過架啦 haha... 又好得意架喎!小朋友唔好比佢自己過份話事,你比2個選擇佢,佢就會好開心咁覺得自己可以話事,呢招好用架!因為佢自己揀左之後,就會負責任地完成,仲好有滿足感添。

 

最怕小朋友細細個就同大人討價還價!你offer 1樣野比佢,佢就貪心地要2樣,唔明點解唔可以滿足現狀,一扭計,D大人就會話 : 好啦好啦! Um..如果真係好,做咩一開始唔話比2樣,咁咪唔使大家講黎講去,既然都唔諗住教。有時候唔係為左果樣野既價值,而係要建立佢一個觀念,識知足!可惜好多大人就係一句: 唔係點唧?

 

“咁唔係點唧?” 呢句說話係咪好耳熟呢? 身邊總有一D爸爸媽媽,同你講湊仔經時,會經常講到呢句 : 咁唔係點唧?? 其實講呢句既朋友係自私的,唔想對小朋友付出,妥協所有野就唔需要花時間去陪去教小朋友,係咪? 所以當講開咁咁咁唔多好喎,佢地就會一句 : 咁唔係點唧?? 我一直都唔相信,一個30歲既大人既智慧會對應唔到一個只得幾歲既小朋友,係睇你想唔想花精神去教佢,並唔係口中所講既無佢符,如果係就大鑊喇,幾歲可以控制大局自己話晒事,細個唔教,唔好諗住佢再大D會聽你支笛喇!下次當自己再心諗 “唔係點唧” 果時,認真諗下方法去管教小朋友,記住只有大人先係最終話事果個,一齊努力教仔吧!