以身作則

響教養呔仔細細既日子,佢地做既每件事,都比我好多唔同啟發。好多時佢地既行為,會直接教識我黎緊應該用咩方式去引導佢地,再檢討自己做過岩既事、錯既事。因為佢地既態度行為,真係完全同我地一模一樣,諗下其實幾好笑,D樣已經又似喇,仲要D格都一樣既,哈!

 

日前同呔仔細細去行玩具部,有個小朋友撞跌左盒玩具,望一望竟然唔執起佢,轉身就走左。細細見到有野跌左,都唔使我提醒,佢已經自動執好擺返原位。我開心架,用心教左咁耐仔,佢地行為良好令我感到安慰!其實我地都係一樣,通常見到野會幫手執起,如果係污糟既,例如紙包盒呀,用過既野之類啦,就用腳踢埋一邊。呔細細個會問點解咁做? 我地教佢,因為D野跌正響路中心,老人家踩到會好易跌低,如果響街污糟就盡量踢埋一邊。其實呢D都係好正常既事,公德心人人應有,人地亂掉野見到唔執,唔係唔關自己事,自己做多D,成個世界都會靚D生活得開心D。

 

此事又令我回想起一段小插曲,當時係大事黎架,而家諗返得啖笑。話說小六時,有日P.E.堂拋豆袋比賽,有位同學就拋左出界,咁岩響我腳底,我咪好心幫手執起佢,諗住拋返入去比同學。老師就走黎發癲喇,問我做咩咁多手執起個豆袋? 仲罰我抄校規聽日交!咁當時咁細個唔知啦,好驚架嘛,老師話要抄咪抄囉,都無諗過自己係岩定錯。反而企我隔離既班長羅同學夠姜同老師理論,話唔覺得我有錯,點解要罰抄? 真係抵佢做班長既!咁當然唔夠老師講啦,咪抄囉。我地細個D觀念唔同而家架!老師基本上係大晒的,又打得又鬧得,其實我buy架,我支持尊師重道!

 

class

 

 

OK,果晚梗係抄唔晒啦,第朝勁驚咪帶埋阿媽返學諗住解釋下囉。點知都未行入教員室,老師已經彈出黎迎接,我而家仲好記得個畫面,好似驚比其他老師知咁。一見我媽咪即刻變臉,又話我平時幾乖(咁我認我細個好乖架喎!),今次都係想教我唔好多事,話罰抄都係隨意,抄唔晒都唔緊要各樣啦.. 就係呢個老師,佢親自示範左比我知咩叫欺善怕惡,仲講大話!講真架喎,未發生呢件事之前,小四的我根本唔知道原來咁都得架咩?!原來老師都會為左推卸責任而講大話架?? 當然我而家明白老師既處境,可能都唔想攪大件事,但佢呢個咁差勁既行為,真係唔應該發生於一個老師身上。大家諗下我而家仲記得呢件事,証明當時的我係幾驚訝!緊記千祈唔好響小朋友面前咁樣反口覆舌,真係會對小朋友心理上好大影響。