做個好榜樣

唔知大家會唔會同我一樣,有左小朋友之後,更加注意自己既言行舉止。特別是響小朋友面前,任何事都會執正D,最簡單既,一定唔會亂過馬路先啦,塞車呀比人亂cut線唔會口up up發晒火。我試過同佢地塞左成個鐘車,其實勁想講: 點呀仲塞幾耐呀? 前面攪咩呀有得衝就衝啦! 我自問係個十分無耐性既人,但我果時就同仔講,唔好心急啦,橫掂塞車不如欣賞下外面風景,或者我地可以鬥講笑話,睇下邊個講得好笑D,講完就差唔多到達架喇。因為你明知自己所做所講既事,甚至脾氣,小朋友一定會學足,今次見到自己發晒憫,到下次佢地遇到同類既事,就會不停埋怨不停催促心急,對佢地唔係一個好既影響。因此我對自己或老公既行為會非常嚴緊,會提醒大家唔好響仔面前發瘟,希望比佢地一個好身教,做個好榜樣。漸漸地,其實響教仔既同時,自己既脾氣都會好左。而我發現呢個做法幾有效,呔仔同細細既脾氣一直唔錯,從無發癲傾向,凡事都係講道理就會明白的,不枉我地多年自我克制,正所謂自己衰好喇,都唔想教壞對仔嘛!

 

20141029_102428

 

好喇,此身教事件又令我諗起早前一件事,係呔仔學校有活動,老公請左假陪細細一齊去fieldtrip。果朝老公開車返學校,其實有個十字路口係唔可以檔住的,排隊drop-off小朋友既車輛就要留空果個路口位比人轉入橫街,呢個係不嬲drop-off開既家長都知要留果條路架喇,即係就算唔係drop-off,正常你都唔會泊正路口中間檔住人地轉入架嘛。好喇,我地正想轉入橫街搵位時,有架車就停左響中間,驚死前面留空會比人插隊咁,唐人黎既。咁我地要轉入,咪響一響horn示意佢我地要轉入,點知佢一個衰樣望過黎仲要整個灘大手板既手勢,意思即係“so what?” 呢個手勢絕對係一個非常無禮貌既無賴行為,我老公即刻著左,開窗叫佢back off,佢都知衰,退後左少少,我老公就行前擋住佢,比佢右面幾架車行晒去drop-off 先,老公話要比D教訓佢,等佢咁驚比人行先丫拿!哈哈!都唔明點解D人做左老豆,會響小朋友面前做D咁野,明明自己錯仲衰態度,我地都係示意佢借一借,點解唔可以say個sorry,有時自己阻左人真係唔知既,咪示意唔好意思,叫人等等囉,連我D仔都話點解果個叔叔咁無禮貌架? 岩喇,即刻用黎做反面教材,教D仔如果自己做錯事仲咁既態度,係非常錯同埋會好乞人憎。有錯就認,改善,下次唔好再犯,有歉意既心,一定會得到別人原諒。