感激另一半

間中卜友會問，見我同weak7結婚咁多年仍然開心甜蜜，係點樣維持架呢? 其實真係無特別去keep，我覺得好多野專登去做，就唔係果回事。如果真係要我諗，我會覺得係兩個人相處既方式同心態。唔講唔覺今年剛好一齊10年，結婚8年了，好驚囉，從來無諗過會同一個人一齊對足10年，除左我媽同阿哥。當初大家拍拖係好細路仔細路女的，走到黎今日10年後，我覺得我地完全無變過，仍然係用返果種方式去溝通相處，又work喎！

話說我自己係個好怕煩既人，係，連嘈交都懶果隻，有問題我習慣逃避，覺得分手係最簡快解決方法。可能之前嘈(比人嘈)得太多了，好想搵一個人係唔使我點講佢可以被我滿意的。唔好以為我咁講係好港女，要男友點樣滿足自己，錯了，8年前嫁比佢只係一隻平價水晶戒指，我甚至覺得所有買返黎既野都唔值錢的，價值低於佢刷完牙會幫我唧埋牙膏，哈哈！曾經佢問過我，點解會叫佢搵街位唔泊咪錶，可能男仔都覺得，要自己女朋友行遠D去搵街位係一件好樣衰的事，但我又覺得，凍冰冰攬住行兩步確係浪漫架喎！原來呢D響男仔心中係值得感激的事。

然後到兩個人相處落，真係夾到離晒譜！我自問諗野古怪，幾難攪的，但佢真係做所有野都係岩我心意，好多野唔使我講出口已經安排好晒。拍拖初時可以話係甜蜜期，梗係咩都開心咩都lum架啦，但何解到今日仲係咁樣架呢? 淨係拖手都覺得好sweet架喎，認真耐人尋味！望住佢呢，我仲係覺得佢好man好型架(sorry係有D嘔，大家盡量忍一忍)，因為佢真係做到一個男人可以保護屋企，照顧得我同對仔好好既承諾！呢樣野，我真係好感激佢，亦自覺非常幸運！

好似我未畢業就陀住呔仔，順勢做左全職媽媽，對屋企經濟上無咩貢獻，頭幾年日子係艱辛的，但老公亳無怨言，努力工作，並一直覺得我全職湊仔仲辛苦過返工，感激我為家庭付出。呢樣野唔係人人會咁諗，因聽唔少人講，女人全職湊仔的話，響屋企會變得無地位，或比老公或其家人覺得好輕鬆變成大食懶。唔好話老公，有時就連街外百姓見到全職媽媽都會覺得做咩咁後生唔做野? 交比外傭或老人家湊都得啦！別人講得輕鬆，有幾多人能夠體會我地全職24小時湊仔婆既辛酸呢? 所以老公懂得尊重我，支持我全職湊仔，我感到非常欣慰。

另一樣相信佢都幾感激我既係，佢做左爸爸咁耐，未試過半夜要起身的，即使係唔需要返工的男人產假時，佢都係晚晚大覺訓。呔仔細細都係人奶B，我既工作就係無日無夜咁埋身餵佢地，同埋不停換片。有D朋友會話，點都要叫醒老公，幫手換片又好暗仔又好，點都要佢幫下手。我又覺得，一個人痛苦(其實是甜的)已夠，自己已經無得訓，何解要攬炒? 老公夠訓的話，第二朝可以幫手湊仔，可以預備野食，點解又一定要嘈醒埋佢呢? 是愛仔愛自己的表現? 但我發現真係好多人慣性攬炒，我無得抖時你都唔使指意輕鬆，我無自由你都唔可以去玩。而其實感情係相向的，係良性定惡性循環，好睇大家願唔願意為對方付出。既然決定一同生活，唔應該事事計較，同時懂得感激對方為自己做既事，相親相愛既日子係多麼的快樂啊！