在家請講廣東話

中三去左美國的我,並非朋友中想像既滿口英文,反而18年來滿口潮語。太愛香港了,從來唔覺得自己hometown係美國,我自欺欺人地,覺得自己只係去浸下咸水,浸到發漲,生埋仔就知,無得呃了,唯有每年返香港住番2個月,當自己係HongKonger (拿我老左我一定回流架,無論香港變成點,我只得呢個屋企!)

 

又講左去太空,返番黎地球先!話說我2個仔,呔仔同細細,都係以廣東話作母語的,由細到大,我地屋企都係全廣東話溝通。唔少相同情況既blog友,甚至我自己,都有一刻擔心過,使唔使幫佢地操下D英文呢? 驚佢地入時,會好難同老師同學溝通,但我最後都堅持美國教育局建議的,如母語非英語,屋企應以自己母語溝通,唔好專登同小朋友講英文。而事實上,學習兩種語言,對小朋友腦部發展同思考係好有幫助的,因外人同佢講英文時,佢會以自己母語去翻譯,直接訓練大腦思維。

 

好喇,經過兩年時間,睇到呔仔細細入後既轉變,事實証明當初對於佢地英文學習上既擔心係多餘的。好似呔仔第一年入,無錯相比起鬼仔同學,佢的確會靜D,無咁踴躍參與課題,因為唔係咁識講嘛,但佢會留心聽老師同同學講野,從中明白學習。而響同同學recess玩時,更係佢學習講英文既好時機!一班小朋友圍埋,好快就你一句我一句了!上年呔仔老師都比左好大信心我,我問佢,呔仔學習上會唔會因為屋企講廣東話而佢英文唔好,跟唔上? 老師話除左少舉手答問題外,其他完全無問題,仲話佢英文拼音響班中算幾勁,我好愕然。然後老師覺得佢唔舉手答問題係性格問題,唔係佢唔識,因為每次叫佢答時佢都識答,佢只係唔鐘意舉手。有左老師呢番說話,我都唔再緊張細細今年入的情況,因為到而家呔仔第二年,我見佢已經同鬼仔同學玩埋一堆,聽同講英文已不成問題,仲識用英文拒絕果個成日問佢拎錢買juice的同學,哈哈!而細細就同上年的呔仔一樣,在堂上少發言,但學習上係一直進步的。睇返呔仔上年剛入既英文評估,對比今年的,都有進步呀!

 

12507498_10153386033016586_1248025742340018384_n

 

而家既我,反而希望努力地keep住佢地講廣東話,怕佢地大大下同朋友同同學溝通,會愈黎愈少講廣東話了。小故事,有次行街入到一間店舖,見到店主係個唐人後生仔,佢同呔細傾計,其間講左2句半咸淡中文,我問,你都識廣東話嗎? 佢話,佢原本應該好流利,因為成家人都好流利,得佢一個係咁,因為細個時佢老師同佢媽咪講,叫佢地響屋企操英文,驚佢返學唔識聽,結果佢媽咪就一直響屋企講英文,攪到佢而家咁,佢媽咪好後悔,仲叫我一定要keep住同佢地講中文,因為一唔講,佢地好快會忘記了。同意,所以往後的暑假,我係會每年帶佢地返香港住2個月的,香港咁多朋友仔,佢地D廣東話一定好好啦,哈!