得到還是錯過?

成長於呢個科技咁發達既年代,有時會覺得自己比上一代既人得到更多,好容易可以知道呢個世界發生緊既野,甚至更多根本唔需要知道既事。唔知好定壞,係得還是失? 但一個年代就係咁,成長於此,無得選擇。作為一個擁有正常社交既成年人,我地避唔得幾多,但作為父母,我希望將小朋友既簡單快樂童年延長多少少;希望佢地響童年得到多少少,再多少少。
 
 
好多人買車,指明一定要有DVD機的,可以既話最好每座位前一部,咁帶細路出街就唔使嘈嘈閉,一上車就靜晒睇電視。我地買車,指明一定唔要DVD機的,如果有,麻煩幫手拆走佢。呢個算係我地可以為小朋友做既一件事,我知道失去呢樣野,佢地會得到更多。結果,每每要坐幾個鐘頭既長途車,我地一家人不停傾計,話題天南地北,2隻仔問東問西又笑一餐。我地仲興鬥講笑話,睇下邊個故事講得好笑D。傾到累了好好休息,個心唔會掛住要睇埋套卡通,睇到頂唔順無晒電先肯訓。我地發現,佢地認路好叻,幾年前曾經經過一次既路,佢地認得之餘,仲記得當日有部milk truck泊過響度!又會留意四週環境,對發生緊既事物好敏感,會問點解有警車閃燈,捉緊壞人定捉speeding?

 

 

DSC06955

DSC06962

 

 

其實出街既原意,就係想佢地睇多D野,問多D野,認識呢個世界多一點。試諗下,如果小朋友一上車就望住部電視望到落車,根本無時間去望下身邊幾靚既風景,亦唔會對車外既事物感興趣。無錯大人係得到好清靜既一程車,但同樣小朋友亦失去佢好寶貴既一段時光。總有一日,佢會好似我地咁,日日拎住部電話篤,有佢地自己既圈子有自己朋友。請珍惜而家仲可以完全霸佔佢地既一段童年時光吧!我都要繼續努力呀,共勉之!