【從細微處看出】誰是大贏家?

記得3年前呔仔約4歲，初入幼稚園時，好多Blog友擔心善良小肥呔仔比同學仔蝦佢。不出所料，見佢比人搶野唔出聲，排隊永遠被打尖，佢多數排最尾，同學問佢既野佢只會答可以。大人會睇得出同學仔有心搵笨，咩都要好的新的，排隊要排第一，自己鐘意的顏色用完都唔會放手比你，但呔仔唔會察覺到呢D，佢繼續開心share。然後我發現，一個人如果無咁既心，其實唔會諗到人地衰，即係佢唔會蝦人，所以唔覺得人地係蝦緊佢。我咁樣睇，如果佢比人搶野時內心無不快，佢覺得無所謂，讓人係快樂既，我唔會阻止，因呢個係佢性格，加上年紀同埋入世未需要深，我唔會專登教佢要點樣防犯，又或者同其他同學一樣咩都要霸住晒唔好蝕底。

然後呔仔開學無耐，一次play time呔仔手執一個沙桶同剷仔自己玩緊，有同學就走黎拎左佢果個完整的，換左一個爛左既桶比佢。我當時無出聲，因我見呔仔無所謂，繼續用個爛左既桶開心地玩。當時我幾感動的，覺得呢個仔堅係型喎！要夠大量，唔計較，先可以做到呢個境界，比著第二個已經嘈左。放學同呔仔傾計，我問返佢play time時咁咁咁喎，原來佢知架喎！佢知比人換左個爛桶，佢掛住玩，覺得無所謂。我教佢，其實自己擁有既唔一定要係最好最靚最多既野，呢個世界有好多人擁有唔同既野，唔需要同人比較，只係睇你點樣去享受你擁有既野，那怕只係得少少，你學識滿足既話，都可以好開心好快樂！好似果個小朋友，佢四圍去吼人地D野，唔滿足自己所擁有，就浪費好多玩既時間。而呔仔唔介意新舊，即使爛桶一樣好開心咁玩，已經係贏左！在我黎講，贏，唔係睇你擁有幾多，而係你擁有得幾快樂！生存就係要開心嘛！

3年前係咁樣教仔，唔知佢明白幾多，但道理我係從小教導，唔理佢地明唔明我都係咁成日講，到琴日呔仔放學，佢同我講: 媽咪呀，阿邊個同學話佢自己係有最多Lego Bionicle架！佢話佢係winner。我又教仔喇，我同呔仔細細講，有幾多唔係最重要，就算只得一個Bionicle你都可以係winner，因為你地係兩兄弟，有伴一齊玩先會玩得開心，而佢一個人對住一大堆玩具無人陪佢玩，有幾多都無用。知足常樂呀仔！只要學識滿足自己有既野，你就係世界上最快樂既winner！今次佢地應該明，仲好開心咁話得一個玩具都可以玩一千八百萬日添(常用數字，意思係好多咁解)^^