【親親大自然系列】行山的隱藏版好處

小朋友放假,大人最煩腦係諗活動比佢地做。除左參加各類嘉年華,約朋友仔睇戲,去Playhouse等,其實行山都係一個好好既活動。我地響美國,行山係件好平常既事,特別在三藩市,處處是山頭。而近年響Facebook都見唔少香港朋友帶仔女行山,相信香港都好多地方可以親親大自然。

 

12321186_1058225797533757_6059963053794010741_n

 
行山其實對小朋友係好好既活動,除左可以呼吸新鮮空氣,對花草昆蟲多點認識之外,仲可以訓練小朋友安全同危機意識。好似我地呢區近日頻頻出現土狼(Coyote),行山徑會有告示牌,叫大家注意土狼出沒,遇到時要面向住佢慢慢退後,或大聲嚇走佢,必要時用石頭掟佢之類,千祈唔好轉身跑,否則佢會以為你同佢玩,會追住你。而有小動物既人,一定要抱起,因發生過土狼咬死小動物事件。當然,最好係一群人咁行動,即使大人,行山都係兩個人以上比較安全,有咩突發都有人幫到手。同呔仔細細行得山多,一邊行一邊講,佢地對行山有一定安全意識。而且知道山林係昆蟲動物棲息地,好自然會細聲講野慢慢行,唔會喧嘩騷擾,教佢地明白去到唔同既地方要遵守唔同規則,亦要尊重動物居住既地方。

 

12920339_1058227127533624_6189265660558318481_n

 
而另一樣我認為行山對大人小朋友都有好處既係,可以舒緩眼精疲勞,呢個係真既!特別是近年大家都好沉迷篤電話篤ipad,雖然呔仔細細無呢個習慣,但我同老公都有(無以身作則,係呔仔口中既not fair呀!) 所以多D行山,望遠野同大量綠色植物,對眼精係好好的舒緩。希望大家將行山作為仔女放假既指定活動,不需太花費,又可親親大自然。