棒下出孝兒?

講得出呢句,大概已經係上一代人。聽過唔少年較年長既朋友,佢地細個都比阿爸阿媽打到飛起,可能上一代既人較傳統,父母同仔女身分高下有別,亦缺乏溝通,覺得打係可以令小朋友聽教,亦係顯示家教嚴格既一種。不過聽到既唔係打幾次就乖番,而係由細打到大,証明咁樣其實唔係好work,哈哈!其實父母用咩方法教都好,都係因為愛自己既小朋友,先會咁勞氣,因為勞氣真係好傷身!

記憶中我讀完小學以後,老師已經唔可以再體罰學生。咁當然,自己屋企一定有打,我就少D,阿哥經常食藤條炆豬肉!到依家呢一代喇,香港我就唔清楚,但美國黎講,無論個小朋友如何百厭,家長老師一定不能體罰,係一下都不能打!無論為咩原因,父母會因為打小朋友而坐監。

shutterstock_143951890

我自己覺得,有好有壞,係為自己洩憤而打(呢D叫虐兒!),定係想比小朋友一個痛的懲罰,希望佢記得就下次唔好再做。不過唔打得都有樣好,就係迫大家比心機去解釋,去認真咁教!打,係好直接地比小朋友知,你做錯左,所以我打你,你下次唔好再做。但點解會係錯? 咁樣做會有咩嚴重後果? 可能你憤怒地打完佢之後,未必會再花時間解釋佢聽,咁樣打法其實係無意思。而家唔比打,可以time out罰企,大家企響度無野做喇,咪有時間解釋佢知佢頭先做左咩唔岩,等佢自我檢討下。就等於上一代既父母,板起塊面一錯就打,小朋友唔會知錯響邊,只會麻木地唔敢亂黎,驚做錯野又被打。可能咁樣既小朋友,響父母眼中係乖既聽話既,但內心既恐懼對小朋友成長都有一定影響吧!

shutterstock_210298597

有時候要教好一個小朋友,關係同溝通都好重要,好似我教兩個仔,佢地會知道,媽咪罰佢地鬧佢地,係因為愛佢地,想引導佢地學好既事,唔好做壞事。我會話,只有真正愛你關心你既人,先會咁勞氣去教你,唔見人地D媽咪走黎同你勞氣? 因為就算你學壞左,佢都唔care你變成一個衰人去坐監,只有緊張你既人先會不厭其煩去教你,呢樣野我一定要兩個仔明白。然後有一次我又好勞氣叫佢地過馬路唔好玩,要打醒十互分精神睇車,呔仔會話,媽咪你係咪因為錫我先話我架? 你唔想我被車死呀? 識咁諗就好,教左咁多年,總算開始懂事,有點安慰。