為何不教??

次次見到一D好百厭既小朋友,我就覺得佢地父母做咩生得佢出黎又唔教好佢,攪到佢咁衰格,神憎鬼厭咁!係真架喎,無論個細路係天性頑劣,定係後天加工比人縱到咁,父母一定係責無旁貸。有時會聽到人地話自己小朋友真係好百厭,教極都唔聽!但有無諗過,自己付出幾多時間去教? 佢做錯一樣野,你係就咁求其話唔好咁做,定還是有分析件事既嚴重性比佢知? 唔好諗住講一次就聽喎,講一次記得就唔係細路喇,呢D係由細教到大,日日教不停教。見到好多人教仔淨係識得鬧,只發洩自己情緒,從來無耐心解釋比小朋友聽咩係岩咩係錯,而當小朋友想探索求証,所有野都想知點解既時候,大人又一句覺得佢地煩就拒絕回應,但轉個頭就只係不停話自己個小朋友百厭唔聽話,究竟係邊個唔肯教,又邊個唔聽話呢? 咁樣真係好諷刺!
 

shutterstock_164786564

 

好似上星期同仔仔去公園玩,見到有班外國小朋友響度不停整斷D樹枝做武器,一個原本修葺得好靚既矮樹籬笆轉眼就一忽忽爛晒,班細路不停踢仲穿左一個大洞。作為一個家長,我真係好想知佢地父母係點樣教到一班咁既生番出黎? 一草一木都有生命,點解要咁樣破壞? 仲要唔係佢私人的,係公家地方。之後見到兩個繞埋手喪傾計既阿媽,見住班細路咁樣,但完全無視,仲聽到佢地行過去叫佢地玩多陣就走。
 

13124573_10153614449956586_1570797772030082190_n

 

家教呀!究竟有無家教? 唔知如果有班人響佢地屋企咁樣破壞佢地既野,兩個阿媽係咪都係無反應,由佢地搗亂呢? D人就係咁自私,難怪班細路覺得咁做無問題!眼見D花草比佢地咁破壞,我行過兩個阿媽身邊時忍唔住同佢地講「D樹比你班細路整爛晒喇!你見唔到呀?」就係咁,佢地係向班細路方向行近左,但繼續企響度繞手吹水,完全無諗過要停止佢地。果刻我明白到,點解D人成日話:人無恥便無敵!真係好無恥,但堅係無敵!你吹佢唔脹,唔通同佢嘈,打佢一鑊咩? 唯有係藉此教好自己既小朋友,比佢地見到一個咁靚既籬笆比班衰人攪成咁,同佢地講點解爸爸媽媽成日要教住佢地,就係唔想佢第時地變成衰人做壞事!反面教材,都係一個好好既學習機會。