跟著小孩慢慢走

我係一個好心急既人,係做左媽咪之後,先開始學習放慢腳步,學習等待。由於個性關係,基本上一個人湊兩個仔對於我黎講係易事,因為我所有野都用最快最方便既方法去做!
 
好似佢地BB時,我好堅持埋身餵人奶,除左營養豐富外,又唔使消毒奶樽,善後攪好多野。換片我又唔會叫醒我老公,叫得佢黎我都換完了,佢好彩,咁多年佢係從未識過半夜要起身湊BB的。沖涼又係,佢攪半個鐘沖一個仔,我5分鐘已攪掂一個推埋上床了。
 
同樣由於性急,我好睇唔過眼身邊D人做野慢或求其,我就會情願自己做,其實咁樣唔好。小朋友慢慢長大,我唔可以咩都貪快手幫佢地做晒,反而係害左佢地,佢地失去左自學既機會。而我要做既係比時間比耐性去教佢地,等佢地學習自立,識照顧自己,咁先係長遠之計。我會經常提醒自己要放慢腳步,同埋要體諒佢地笠件衫笠黎笠去都笠唔到!耐性呀,其實無,所以話做左媽咪後,真係要轉性,唔調教下自己,好難配合小朋友,佢地會好大壓力。例如佢地晨早返學動作慢少少,我會忍唔住催促,即使未夠鐘,我係情願返到去先抖,都唔鐘意慢慢行。又好似沖涼咁,佢地6歲同7歲,都係剛開始自己沖,又會擔心佢地沖唔乾淨,洗唔清D泡泡,個頭仲立立地,哈哈!好想幫手跟,但又要阻止自己,叫自己放手啦,提下佢地就夠,唔可以再出手了。

 

shutterstock_89898382

 

原來湊仔唔簡單,發現小朋友唔同年紀,父母就有唔同既野要適應同學習,而家既我,跟住兩個仔走吧,希望自己能夠放慢腳步,好好悠閒一下吧!