滔滔不絕是一種信任關係?

每日接兩個仔放學,就係我地愉快交流既開始。兩個小朋友會不停不停講,例如今日發生左咩事,中午食左咩做lunch,邊個同學被老師罰,Recess時候同同學玩左咩? 各人又扮演咩角色等,可以一直講講講,講到返屋企。有非常多既問題,非常多既假設,想知道既事實在太多。每次我都聽得好投入,好有興趣知道佢地既事,我既反應亦令佢地更有興致繼續講。我覺得係好事呀,因為佢地鍾意話野比我聽,亦鐘意聽我解釋每事,我地母子三人擁有一個非常信任既關係。

 

shutterstock_426282652

有次兩個仔去朋友屋企Sleep-Over,翌日朋友話,點解兩個仔可以咁多野講,咁多問題,真係不停講,咩都問一餐,哈哈!都係喎,我開始留意,發現唔係個個小朋友都係咁樣,好多小朋友唔出聲的。

我自己咁樣睇,小朋友有無興趣講野比大人知,絕對在於大人對佢地發言既反應。見過唔少大人,小朋友講多兩句,問多兩問,就話佢地好煩,叫佢地收聲唔好嘈,又話佢地D問題無聊呀咁,其實咁樣真係好差!小朋友就係不斷學習,重覆問題或問無聊問題都係重要過程,唔問過唔答過,又點知個問題無唔無聊呢? 有時聽到大人話D細路煩,一句就令小朋友唔敢或者唔想再問,怕被人鬧,久而久之都無興趣再同你講野啦。加上而家流行電玩,一家人外出,上至父母,下至半歲BB都係望住個MON,成餐飯可以無溝通既,小朋友又點會習慣同父母傾訴呢? 我覺得,咁樣影響其實非常深遠。從小關係咁疏離,青少年反叛期就更加有事唔會同屋企講,情願搵朋友解決,好多大鑊野就係咁樣發生。

 

shutterstock_377732704

從今日起,不必要就少用手機吧,付出多D時間陪小朋友,重拾仔女同自己既感情。認真專心聽下佢地既內心話說,有見地又好,無聊又好,佢肯同你講已經証明佢對你既信任,溝通先係一家人緊密關係既重點嘛!