點解人地住大屋?

小朋友成長會有好多問題,開始長大了,仲識得去比較別人有既野,同自己有既野。好似近排,呔仔提及到一個問題,就係點解人地可以住兩層屋? 而我地屋企得一層?

shutterstock_266767748

呢個問題,可能對好多人黎講只係好普通既一件事,可能會好隨便咁樣答話「人地有錢過我地囉!」就算。但對我黎講,呢個問題入面,係有包含左好多值得去討論同埋教育既事,對於小朋友同思維黎講,係一個好重要可以灌輸既時刻。特別是而家呢個社會人人向錢看,D好偏離!所以更加要捉緊機會去教育子女關於呢方面既思維,引導返佢地去正途!

我想教導對仔識得去諗一D深入D既野,係每件事情背後既野,而唔係只睇到表面就去評論,又或者覺得金錢係人生唯一重要既事!所以我會咁樣去教...

除左好表面咁答話「人地有錢囉!」之外,要佢地知,其實好有錢既人,都唔一定要買好多層既屋架喎!屋係自己既居所,唔一定要好大先舒服,剛好足夠就夠。而屋企入面有咩係重要呢?

屋企人!

shutterstock_222328228

你同邊個一齊住,果D人錫唔錫你,對你好唔好係最緊要!屋企又有你最鐘意既野,玩具啦書本啦公仔啦,你訓覺用開既枕頭被被啦,呢D所有屬於自己屋企既溫暖,係你住十層屋都比唔到你既。仲有開心既感覺,屋企人相處融洽。如果日日返到屋企唔開心,家嘈屋閉既話,比幾大既屋你住都無意思,因為你只會想留響你間房入面。

2.點解人地可以有錢買兩層屋? 而我地只可以買到一層呢? 其一原因就係,媽媽過去8年可以用黎搵錢搬大屋既時間,都要左黎陪住你地成長。我會叫佢地留意下,其實有好多同學都唔係爸爸媽媽接送,有好多爸媽要做野既,佢地放學要留響學校到5、6點。可能咁樣搵多左錢,佢地可以住兩層大屋,但呢個又係咪你地希望既生活模式呢?

shutterstock_189988664

我有問過佢地,如果呢8年我同爸爸兩個人都出左去做野,每日都做,而由佢地BB開始就拎出去比人湊,到返學後,放學就要留低響學校直到我地放工先去接,但就可以住到一間兩層既屋,咁佢地會點選擇? 佢地答話想要媽咪陪住,想有媽咪接送,情願住間細既屋。而大屋就等佢地第時大個做份好工先夾錢買,而家咁樣好開心!

聽到佢地咁講我都真係好安慰,因為呢個係爸爸媽媽對小朋友既付出,爸爸一個擔起頭家更辛苦,而媽媽就化身全職湊仔婆,每日面對唔同EQ挑戰,為既就係小朋友可以由媽媽自己湊大,我可以親自教導佢地做人處事,令佢地明白金錢以外仲有好多更重要,更有意義既野可以追求!

shutterstock_195218957

人生一定會想追求更好,但要抱住平常心。因為呢個世界一定有人好過你,亦有人差過你,可以同昨日既自己比較,變得更好。但唔需要同別人比較,因為大家既出身條件,生活模式,甚至追求既野都唔同,比較黎都無意思。希望對仔明白知足常樂,當你識諗,滿足自己擁有既野,自然會生活得開心快樂了!