別以為孩子不懂

自問唔係一個長氣既人,相反仲幾無耐性,從來最怕人講野長篇大論。唔做阿媽,真係唔知自己原來可以咁有耐性,我係捉緊每個機會去身教又好,講解又好,總之有任何事情發生,都會同兩個仔討論一番。

shutterstock_518241898

佢地細個時成日有人同我講,佢地咁細個,你解釋咁多野比佢地知道,會聽得明嗎? 懂事嗎?

其實細個先係人格定位的關鍵期,對與錯,就係咁樣形成。我覺得佢地真係明架喎!

shutterstock_520545625

我覺得小朋友一出世已經有感覺,就算係好BB既時候,就算未聽得明或者未識回應,已經知道果個氣場係怎麼樣。

即係,家庭氣氛和洽,充滿愛,佢地會好舒服好放鬆,容易開心。相反,如果屋企成日家嘈屋閉,父母成日嗌交黑口黑面,你以為BB唔識分嗎? 佢地會變得精神緊張,常哭,心理亦大受影響!

佢地好細個時,我已經慣左每樣野都解釋,唔可以淨係話得同唔得,係要解釋點解得、點解唔得。可能慣左,兩個仔做任何野,即使食粒糖,都會問過我地可唔可以。我覺得咁樣好好,大家習慣互相尊重,即使我地拒絕,兩個仔都唔會亂發脾氣,因為知道每件事都有因,可以做既話我地亦唔會無理地拒絕。

shutterstock_495487651

好似剛過去既,外國氣氛濃厚,好多小朋友去Trick or Treat,四圍拍門拎糖果。呔仔細細對糖果興趣不大,連籃都無帶去,但佢地鐘意變身去街行下,感受下氣氛,又睇下其他小朋友扮D咩人物,覺得好開心!同行表叔聽到表示驚訝!點解兩隻野會妥協唔拎糖果,佢話如果細個媽咪話唔拎,又或者拎左唔比食,佢會發脾氣情願唔去!

shutterstock_15732280

唔係呔仔細細古怪,而係佢地知道拎幾多糖都只會食幾粒,因此唔會瘋狂。我地每年有個協議,就係拎返黎既糖,佢地可以選幾款最鍾意的留起,其他就帶返去請同學食,或者爸爸帶返工比其他同事,借此教育分享既快樂。可能你地會話,咁佢唔制呢? 扭計呢? 點算? 呢個就係在於,大家對協議承諾既重要性,即係平時大家應承左小朋友既野一定要做,唔可以拖,此法自然奏效。

另外就係,你點解釋比小朋友聽Trick or Treat呢件事,例如食糖太多既壞處,又或者你拎太多糖,咁其他遲左既小朋友拎唔到會好失望,要留返比人地都有得開心嘛。其實好多野都係睇我地有無心機去講去教,呢D都係大家有時會見到佢地想法正確既效果。只要大家一直有同小朋友講道理,而我地做既事又真係有道理既話,佢地係會懂事,會聽話的。

shutterstock_520374073

果朝,我返左學校幫手,放學前我聽到呔仔老師對同學講,今晚大家開心Trick or Treat,但記得唔可以一邊拎糖一邊食,要拎完返屋企先食,同埋要問過爸爸媽媽,經佢地批准後先可以食,同埋唔好食多,會肚痛,最多2至3粒就好了!我聽完,真係幾感動!唔係每個老師響教學以外都會幫你教仔,仲要同我個理念相同,所以呔仔細細更加聽話,因老師同父母都係咁講,相得益彰!所以話,在家靠父母,在校就靠老師了,好開心可以遇到一位好老師,真係好幸運呢!