別只在街上管教小孩

大家出到街,應該唔難遇到響大街大巷發癲鬧仔教仔既家長,特別響香港呢D人煙稠密既城市,聽人教仔就好似梗有一單響左近咁!又唔知係咪地方太擠擁,同隔離師奶相隔唔夠一尺,大家對響街教仔一事似乎有群眾壓力,好似教仔係做比隔離D群眾睇咁,一邊教就一邊望下人地D反應,隔離阿姐八起上黎又插兩句咀,講真真係唔知有咩謂,最重要係,咁既環境下教仔,個細路真係會受教嗎,真會聽入耳嗎?

shutterstock_333235937

一直覺得,如果一個細路響屋企係有家教既話,理應唔會一出街突然變左無家教掛?! 好似去 Playhouse 有細路扮大佬唔比其他小朋友去佢既範圍玩,立晒所有波波唔比其他小朋友射,要其他家長叫佢又或者同佢阿媽講,先肯免強地比人玩!然後佢阿媽就大大聲聲教仔比其他人睇喇,話比人知: 拿我有教佢架,佢唔聽話我都無辨法!唉,不如慳返啖氣啦喂,我覺得你響屋企有認真既,呢D咁基本既禮貌唔會無,個細路出到街又唔會咁失禮啦,既然無心,又何需專登教比人睇呢?

又見過一家人,父母一直叫家姐讓細佬呢樣果樣,好喇響公園玩時細佬唔肯排隊,爸爸扯佢落黎要佢排,阿細佬就即刻發癲扭地,好正常啦係咪? 你響屋企要全家人就晒佢,做咩出到街唔叫全部人就佢? 做咩佢響屋企可以大晒,出到街要守規矩排隊? D大人真係好難觸摸喎!然後又賴左個細路喇,變左佢唔聽話喇。你響屋企唔教,佢出到街又點會自動變乖?

shutterstock_406436800

老土D講句,小朋友真係白紙一張,你比D咩訊息佢,佢就接收得一字不漏,你做每一件事講每一句說話,都直接影響佢人格形成。D 仔女教好左係自己既,其實唔使同人交待,佢一直長大係好係壞,亦係閣下自理。周街教仔其實真係無意思,大街大巷人又多,根本無辨法認真去傾,去解釋比小朋友聽件事對與錯,反而響群眾壓力下,好多時係會令事情變差,甚至為面子愈鬧愈大,自己更難下台。平時在家,就應該多花時間同仔女傾計,逐樣解釋佢地知,點解唔好咁做,要佢地設身處地多作反思。自己亦做好榜樣,為左仔女唔好懶惰。教仔之路不易,大家想有好日子過,唯有努力教好佢地!