大一定要讓細 是什麼道理?

有無發覺,大多數有兩個或以上小朋友既家庭,細果個係特別難教,特別任性。就好似屋企既小霸王咁,個個都就晒佢,而大果個呢,自從細佬妹出世後,除左分薄晒父母既愛之餘,仲要開始硬食,真係慘豬豬。我地成日會聽到: 細佬妹細呀,你做阿哥家姐要讓佢,要就佢!細佬妹唔識野呀,你做阿哥家姐既要明白,唔好怪佢!有無諗過,其實做阿哥家姐既,都係得果幾歲人仔架咋,由萬千寵愛跌落谷底仲唔夠,仲被要求忽然長大明事理,好似講唔通喎!

眼見唔少朋友,細既出世後,大果個慢慢無晒地位,成日硬食比人鬧,呢D多數當事人唔覺,覺都唔認架喇!又咁講啦,惡性循環黎既...

細佬妹出世後,父母既專注比晒佢,大果個梗係唔老黎,可能會做D野出黎引父母注意,又可能因為呷醋而整鬼個細佬妹,父母見到又激氣鬧仔,大果個又更加唔鍾意,更加覺得係父母偏心。同埋年紀相距都有影響,你會聽到大既話:我咁咁咁媽咪就鬧,細佬妹做又得,又唔鬧佢地!

做父母既會覺得大果個係明知而為,細既係唔識又或者跟住大既做,所以梗又係鬧大唔鬧細。所以有兩個小朋友既父母,係要好小心咁處理子女情緒,唔好有太多不公平對待,咁樣除左破壞自己同大仔大女的關係,同時亦導致佢地兄弟姊妹不和。如父母能做到賞罰分明,公平唔偏心既話,其實兩個小朋友可以相處得好融洽,好錫對方,重點完全在於父母點樣教育。

響我地屋企,阿哥唔一定要讓細佬。特別是對仔開始大喇,有自己思想,唔會接受唔公平既要求。如果只講話:你係阿哥,你要讓佢!阿哥會問:點解呢? 係囉,我都唔知點解喎!我反而覺得,做阿哥做家姐既,唔係要讓細佬妹,而係要教細佬妹,呢個好重要,亦都有得解釋。因為做得阿哥家姐,年紀大D識既野多D,咪就係要教細佬妹囉,唔需要讓佢地架喎,但可以教好佢地,想玩就教佢地問人可唔可以,人地玩緊就要排隊,教佢地學習等待,學習守禮貌。咩都就晒細佬既,並唔係最好既兄弟相處方法,因為細佬都會長大,唔會永遠做細比人錫比人就,想佢知道,佢都可以讓哥哥錫哥哥,做細既都有能力互相幫忙,保護對方,咁樣兄弟關係先會親密,先會長久。