想給孩子受個挫折

剛過去既,我地一家外遊,住一晚酒店。呔仔,我大仔,帶左佢最好既朋友獅仔(一隻海獅公仔)陪佢去酒店訓覺。第二朝check out,呔仔完全唔記得左執返獅仔落行李袋,好彩老公臨走有執,無漏左響酒店。上車離開後,老公問呔仔,獅仔呢? 有無記得帶走佢? 呔仔開始緊張,又開始擔心,知道自己無帶獅仔走,好驚佢唔見左。之後不停問可唔可以返去酒店房搵,老公就話有都比人執左,又或者下個黎check in既人會掉左之類,唯有一陣打去酒店問,不過都好渺茫了。

shutterstock_281011211

呔仔聽到後,開始崩潰嚎哭。呔仔係個非常重感情既人,失去獅仔呢件事對佢打擊好大,佢一路響車諗起又喊,諗起又喊。雖然係好心痛個仔喊成咁,但都要比佢感受下,因為自己唔上心,無責任感而失去左一樣咁深愛既野,係幾咁後悔同傷心!

細仔既話我地可能唔會咁樣整佢,因為佢本身好take care自己既野,好有手尾有交代的,而呔仔係不嬲都粗心大意,無咩責任感,所以我地先會整下佢,等佢以後多注意,緊張自己既野。

shutterstock_241328533

現今小朋友太被寵了,其實無咩機會嘗試失去既感覺,無左唔見左既野,轉頭父母就即刻買返喇!雖然大家心知捱出黎既小朋友,長大必定更堅壯,所以好想比佢地捱下苦受下挫,但時代唔同了,唔同上一代,10幾歲細路仔就幫阿媽煮飯湊細佬妹咁。唯有係自己盡量比多D責任小朋友,安排多D野比佢地做,訓練佢地獨立,同時亦比佢地知道其實佢地比好多人都幸福,要懂得珍惜自己擁有既野。而擁有既唔一定係物質,就算有機會悠悠閒閒睇一個鐘電視,都係一件值得感激既事,因為唔係人人有呢D閒情去輕鬆享受,好多人每日都爭取時間去為生活奔波。知足常樂,希望大家都珍惜同滿足自己擁有既野,健康快樂就好!

untitled-1