慢慢不做和事佬

小朋友開始成長，自入學後就好似進入左一個小型社會咁，會遇到好多人同事，係頭幾年只響自己屋企生活時未見過的。好似我兩個仔，入學前幾乎每日見到既都係我，當然仲有爸爸，家人朋友，但遇到既都係正常事，無甚麼需要擔心，因此佢地既社交技巧以及自我保護意識可以話係零。幸好兩個仔年紀相近，都叫有得爭下野，嘈下交，訓練番少少保護意識，即係自己想玩既野比人搶左都識嗌，哈哈！

大仔初初入學時，驚人驚到..果時幼稚園老師話，有同學行埋佢身邊佢自動彈開的，老師擔心佢社交問題。幸運下一年已開始融入，到升左小學直情係四海之內皆兄弟果種，連大一兩年的同學都一齊玩，老師話佢勁多friends。性格就無得改，由細比人搶野都係雙手奉送，唔同人爭的。在我而言，只要佢唔覺得比人坤左，又真心覺得 「你鐘意咪比你囉」我又覺得咁樣幾好喎！做人唔計較，其實得到的更多！呢個亦可能係佢咁多好朋友既原因吧！ 細仔就因為有阿哥做膽，從小比較外向的，不過亦因為有好阿哥做榜樣，所有野都係比晒人，非常鐘意sharing。

佢地細個D既時候，一有爭執就會黎搵我同爸爸解決，但開始大個喇，希望訓練佢地有自己解決問題既能力。特別是上小學後會遇到唔同事情，大事當然教佢地搵老師搵大人，但小事的話就唔好下下要人幫吧，自己都可以學習衡量輕重，搵出解決辨法。因此早於一，兩年前，每逢佢地有野拆唔掂，走黎投訴等，就會叫佢地自己諗方法解決。響小朋友心中，公平最重要！邊個自己首先做錯，一定承認的，其實個情況同搵我解決一樣，講既說話都一樣，只係換左做佢地自己講番。咁邊個做錯，另外一個點樣先原諒，就自己決定喇！慢慢其實發現，好多時只係為嘈而嘈，轉頭又攬頭攬頸了，甚至於一個被罰時，另一個已經想同返佢玩。所以呢，做父母的唔好插手太多，慢慢不做和事佬, 反而比多D空間小朋友自己解決問題，對日後同其他人相處都有幫助呢!