世故的小孩…

可能自己有兩個小朋友既關係,我睇小朋友既情緒會睇得好微細,好似我兩個仔每句說話,每個表情,我都會盡量想去了解多D,然後同佢地傾計時開解返佢地D心結。小朋友唔係大人,即使佢地想避開大人視線,但未世故到可以掩飾到自己情緒,興奮、開心、失望、妒忌,所有感覺都不能完全掩飾。如果你想了解一個小朋友,只要細心D觀察佢地既言行,佢地既第一反應,其實不難發現佢地既感受。

點解我會講起呢個話題? 響我心目中,小朋友根本就唔應該掩飾自己既情緒,開心唔開心都應該盡情顯露,唔應該有咩擺響心上,咁先係小朋友既童真。但唔知係咪香港既小朋友比較早熟,又或者叫「被迫早熟」,我返香港見到既小朋友並唔同在美國呢邊咁傻更更的,我睇到好多小朋友既行為,所以想響度講講,希望平時甚少注意小朋友感受既父母們,可以留意一下,而呢少少轉變,可以對小朋友成長性格形成好大影響的。

例一,見過一個幾歲小女孩,佢有個BB妹妹,我地一齊食飯時,佢響父母面前表現得好錫妹妹,但多次趁父母望唔到時,專登拎走妹妹玩具等佢喊,又專登推跌佢件玩具,話係BB推的,BB好百厭!呢件事黎睇,我唔覺得全部係家姐仔既問題,反而會覺得,情況咁嚴重,父母都察覺唔到嗎? 父母都有好大責任。其實父母唔注意小朋友既行為情緒,係會累及兩姊妹都好慘,一個心理唔平衡,一個無辜比家姐蝦,兩個感情唔會好。

我覺得父母可以做既,特別係有兩個小朋友的,除左非常公平地對待兩個小朋友,亦要不時抽時間同大果個傾心事,聽下佢地內心世界,覺得做左哥哥/姐姐點樣呀? 又解釋下因為小BB細個,所以需要照顧,而唔係淨係理BB唔理佢地。因為有時唔係大人專登唔理大既感受,而係自己都唔知自己行為會令佢地呷醋不滿,例如你一見到小BB就情不自禁地好得意呀媽咪錫晒呀咁樣,就算只係戲言,大既唔識分辨,聽到只會唔開心,點解個個一見BB就完全唔理我,繼而又係做細既無辜被討厭。

(待續)