advertisement

早前響Youtube見到一段短片,美國一個響超市餵母乳既媽媽被一位阿叔歧視,工作人員為保護該媽媽,與阿叔對罵。我響自己Facebook分享左呢條短片,有朋友驚訝,原來外國人都會歧視母乳媽媽? 外國唔係好open嗎? 不啦!外國人有時比香港人更固執,思想更封閉。

 

我自己都曾經係一個餵人奶既媽媽,兩個仔,每個餵左大約一年,一年都係埋身餵。關於人奶對BB既好處都唔需要我多講,反而我覺得餵人奶對媽媽既好處都非常多!身體雖然疲累,但心靈絕對係好滿足的,同BB私有既親密關係,每每諗起仍然好心甜。而現實D黎講,屋企洗少好多野,出街又帶少好多野,十級方便,所以我絕對係母乳支持者。

響美國餵人奶係容易既事,平時車出車入,餵人奶可以響車餵,而商場亦有好多店舖設有Women Lounge或者 Family Room,隨時餵奶都有個位可以坐下。記得大仔6個月大時,第一次帶佢返香港,當時仲係埋身餵人奶的。由於已經有6個月埋身經驗,搭飛機都非常順利,因為佢一嗌就比佢啜,啜一陣佢又訓返,反覆都訓足成程飛機。而我返香港前已買定一塊餵奶巾,係一塊好大的圓型巾,中間有個窿比我穿過頭,我向下望入去可以望到BB,坐時蓋到落肚,其他人係裝唔到的。因為知道香港唔係四圍有餵奶室,就算有,如果有媽媽用緊時,都可能要等半個鐘,BB都餓喊了。有餵奶巾的話,我就可以隨時隨地,搵個位坐底就阿仔就開餐。結果成個香港Trip都好順利,除左換片要等房之外,餵人奶係無障礙的。

我身為一個媽媽,當然唔覺周街餵人奶有問題,你問我,我會覺得係件好值得欣賞同尊重既事添!至於能否「周街餵人奶」,本身係好講個媽媽既心態,一定要自強。如果自己認為岩,其實無必要理會人地點睇,除非佢敢埋黎搞你鬧你,否則可以當其他路人透明,自己享受餵仔既時光就足夠了。你又可能話,途人既目光真係好奇異,好似我唔應該周街餵BB咁。我當然覺得唔需要理會,或者你直情唔望佢,就唔知佢用咩眼神望你架啦!但如果真係咁緊張同有壓力的話,好似我咁,我好多時係面壁餵,可以面向住牆企,或者無人既凳位就解決了。我鐘意面壁,其一原因係可以大動作時都唔怕走光,又可揭起少少條巾等阿仔無咁焗。餵人奶係自己話事,搵個適合自己既方法就可輕輕鬆鬆享受親子時光啦!