如何令小朋友習慣誠實

我唔係一個傳統媽媽,老公亦唔係傳統嚴父,所以我地屋企經常都充滿歡樂氣氛。小朋友可隨心所欲,唔會話呢樣唔得果樣唔比,亦因為咁,我地兩個仔有既好習慣。我相信如果父母唔係亂鬧亂罰,小朋友唔怕同你講真話的。大多數會講大話既小朋友,都係想逃避父母懲罰,如父母每次都好大反應,就會增加佢地講大話既意慾。雖然我地歡樂地教仔,但其實我地既教育方法一D都唔散漫,只係我地著重小朋友既成長,並唔係要軍訓佢地不能行差踏錯或要佢地讀書好叻,我地著重既係佢地性格發展,認為德育好重要!

好似前兩日放學,細仔返到屋企佢拎住張Thinking Sheet行埋黎同我講,今日做錯事了,比老師罰寫悔過紙。因為要驚動家長簽名,所以好驚,全日響學校都好擔心。呢次係細細第一次有Thinking Sheet,但我無大反應...

 

我成日覺得,如果咩都未了解就好大反應,會對小朋友造成無謂既心理壓力,更加難了解事情。慢慢問佢發生左咩事,老師會比悔過紙佢寫,原來係佢上堂時掛住同同學講Pokemon D野,無留心聽書。原來仲講左2次,第1次被老師罰左去坐Thinking Chair,第2次又講,老師就罰寫悔過紙。我問點解會罰2次同一樣既事既? 佢話係因為唔記得左第1次早上罰完,下午又再講,因為好鐘意講Pokemon D野,所以同同一個同學講2次,該同學都一齊被罰。聽到時,其實個心好想笑,小朋友即係小朋友,真係好難控制自己唔講無聊野,但我都要緊守媽媽既角色,要教佢小息先可以傾閒計,上堂時就要專心聽書,老師咁有耐性教你地,分心係好唔尊重老師等等。

諗起從前自己返學時,咪又係忍唔住不停同隔離位傾計傳紙仔,我諗呢D都係學生哥必經階段吧。當然要教小朋友唔好咁樣,但老實講,我又唔覺得係好嚴重既事,所以我都唔係好大反應,只罰左佢weekend唔可以睇電視,佢知道自己唔岩,亦同意受罰,事件就咁完結。

反而我想知老公係點睇...

 

我專登無講我既諗法,叫細細同爸爸講今日要寫悔過紙呢件事。細細初時有D驚,因為爸爸平時惡D罰得重D,但經我鼓勵下,都鼓起勇氣同爸爸講出事件。結果老公既反應同我一樣,都覺得只係上堂傾計,唔係做百厭壞事或令同學唔開心既事之類,覺得唔係品德上既問題,都同意只罰細細無得睇電視,不嚴懲,細細放心了。希望一直冷靜地處理佢地發生既事,可令佢地一直,有個良好既成長。