小朋友好知機 爸爸媽媽誰當壞人?

成日聽人講,屋企裡面爸爸媽媽一定有一個做好人,有一個做壞人,其實我並唔完全同意。一般家庭,如果爸爸要外出工作,而媽媽係全職湊小朋友的話,大多數做壞人既都係媽媽,而放工返來無咩時間照顧小朋友既爸爸呢,就多數做好人。因為已經無時間對住小朋友,難道一見到就鬧嗎? 又由於內疚感作怪,一般爸爸能夠對住小朋友既時候,都係比較寬鬆放肆,咩都順晒佢地意。

 

而我地屋企都係我對住兩個仔既時間比較多,爸爸就返工搵錢支撐屋企經濟。我地所教既方法,係向道理看,邊個有道理就聽邊個講,所以無話我做好人定爸爸做好人,因為小朋友犯錯或胡亂發脾氣,係無人會做好人救佢地。我覺得呢樣野都要做得幾嚴謹,唔可以有第一次拯救,因為小朋友好知機,今次走得甩,下次就唔會覺得有問題,會重覆犯錯,甚至變本加厲。

 

 

另外一樣好重要既係,爸爸媽媽是但一個教緊仔,另一個如有意見都唔應該即時出聲,可以事後討論,但唔好當眾拯救或同教緊仔既一方理論,咁樣會令小朋友覺得唔需要尊重教緊佢既人,或懷疑被教緊既道理是否正確。其實係好簡單既身教,爸媽響小朋友面前理論,會令小朋友覺得究竟聽邊個講先岩? 媽媽話我錯,爸爸又話好小事唔使咁惡,咁會令小朋友無所適從,難辨是非。當然兩公婆有共識有默契就最好不過,大家有同一套教仔觀念,自然事半功倍。

 

至於教仔另一阻攔,一定係屋企既老人家。我都唔例外,我媽咪,即佢地婆婆,係超縱佢地,超無規矩的!而「我地教仔時唔可以插咀」呢樣野雖然一早講明,不過佢多數唔理,到其時一樣幫口。兩個仔細個時,我既做法係入房教,教完先出黎,但都試過佢聽到D孫喊就拍門。無辨法,唯有自己睇開D,都明白老人家見到咁細個孫一定唔捨得佢地被鬧,咁錫佢地總好過唔錫既。老人家講唔聽,唯有向細路埋手,話比佢地聽婆婆咁樣係因為太錫佢地,但唔代表係岩,要佢地知道婆婆咁做既出發點,佢地就會明白即使有婆婆幫口,但件事都一樣係錯!久而久之,而家兩個仔係會教返婆婆,會話係佢地做錯要受罰,唔會因為婆婆幫口就恃寵生嬌。

 

 

由細到大對兩個仔重覆的講道理,加上一直以來犯錯都唔會有人救佢地,令佢地明白做錯就係做錯,就去改善,唔會等人包庇。八個年頭開始種出成果,兩個仔尚算聽教懂事,有自己獨立思維,懂得對錯,總算無白費我地多年。教仔真係一件好花時間好費神既事,但這就是做父母既職責,相信只要努力地教,小朋友一定會學得更好的!