advertisement

Colin Chan 陳子豐

「哇…哇…哇…」
就係由孩兒呱呱落哋嘅呢幾下喊聲開始,我嘅人生就徹底咁改變咗。

我哋選擇剖腹生產,喺約定日子入醫院嘅前幾晚,一位好兄弟好興奮雀躍咁問我:

「阿豐,你老婆嗰日幾點生啊?」
「朝早六點半要到醫院。」
「咁早啊!?」
「你哋傍晚先嚟探我哋啦。」
「我同阿康(另一位好兄弟)想嚟陪你哋,我哋就喺手術室門外等…」
「但係真係好早喎,同埋我都要問咗我老婆先喎…」
「我哋好想喺手術室門口一路好心急咁等,直至聽到BB喊聲,我哋好想feel下嗰種感動!」

感動?...係喎!

Colin Chan 陳子豐

其實由老婆懷孕開始,我好似一直都冇時間去想像,BB出世嗰刻究竟會係點。會唔會好似電視劇,爸爸喺走廊聽到BB喊聲會感動到喊?
剖腹期間會唔會見到好多血嚇到暈咗?
條臍帶難唔難剪?
手術期間我應該做啲乜講啲乜先安撫到老婆?

結果,我諗咗唔夠十分鐘,又要忙住買嘢執嘢準備迎接我家新成員。而我兩位好兄弟亦唔能夠得償所願去手術室門口「feel吓」,因爲陳太覺得一個女人生仔,但係有三個男人喺門口等好古怪。

到咗生產日,因為冇乜點瞓,我成朝都迷迷糊糊,同陳太都冇乜點講嘢。直至換咗病人服,我哋先真正感到非常緊張。入到手術室,陳太淨係識講:「我好驚啊!」,我亦不停安撫:「唔使驚,我會一路陪住你。」呢兩句說話,重複來回咗百次左右,簡直好似冇記性嘅曾sir做實驗咁重複重複又重複...

其實我知我講咩都安撫唔到陳太,唯一可以做嘅就係捉實佢隻手。眼睜睜睇住陳太被支極粗麻醉針打落背脊、睇住陳太被麻醉師岀盡全力推壓佢個肚... 成個過程都覺得好心痛,亦覺得媽媽真係好偉大!

「哇~哇~哇~」

BB岀世一刻,一滴眼淚不自覺流落嚟,唔只係因為感動,而係因爲陳太唔使再受苦喇!我冇即時去睇下個仔,而係好用力咁捉住陳太講:「對唔住啊~我哋唔再生啦,唔想你再受苦…」

事前冇乜點諗過BB出世一刻係點,而原來就算有啲對於做爸爸好cliché好公式嘅想像,我竟然冇諗過,除咗親眼睇到同老婆嘅結精品誕生以外,同時親眼見證生產過程嘅震撼、激動係咁樣。

就係由呢幾聲「哇~哇~哇~」開始,我作為爸爸嘅身份正式開鑼,緊接落嚟我知道有好多責任、擔心、壓力加諸我嘅膊頭上,但係BB出世嘅呢一日,我同自己講,除咗做個好爸爸,我更加要繼續做一個好丈夫。

Colin Chan 陳子豐

好開心可以喺she.com同大家分享我人生呢一個咁重要嘅日子。嚟緊我會繼續分享「踏上這爸爸旅途」嘅點滴,歡迎大家同我交流㗎!

Colin Chan 陳子豐

Colin Chan 陳子豐

廚藝了得之暖男一名,今年正式晉級為一子之父。
香港演藝學院表演系畢業,旅遊、休閒節目及真人騷主持《歐遊全細界》、《Se7en》、《的士Go》、《吾係本地菜》、《非常食客》等等,曾演出不少廣告及劇集,包括viuTV劇集《詭探》、《已讀不回》、《PlanB》;香港電台《好想藝術》短劇、《獅子山下》《火速救兵》、《那些年那些歌》等

IG: @colintszfung / @babybossjared