陳子豐專欄(3):做人最緊要識睇老細眉頭眼額⋯

陳子豐專欄(3):做人最緊要識睇老細眉頭眼額⋯

老細,永遠都是最麻煩難搞的人。因為佢唔會任何事任何感受都宣之於口,即係佢唔講你知,但又想你估到佢諗乜。所以,做打工仔最重要是要學懂觀人於微,識得睇老細眉頭眼額。

但係我點都估唔到,原來做爸媽,都要識得呢啲職場技巧,因為屋企個老細唔係唔講你知,而係唔識講。

老細唯一會表達的方式,就係喊。

陳子豐專欄(3):做人最緊要識睇老細眉頭眼額⋯

開初,老細每次喊,我同陳太都會立即神經緊張,九秒九衝去雪櫃攞支奶岀來翻熱,務求用最短時間滿足老細,停止佢呼天搶地嘅喊聲。跟得官耐就開始知官姓乜,我呢個新手爸爸開始分辨到老細只有兩個情況才會喊:一係肚餓喊,二係眼瞓喊。(情況因每個老細脾性而略有不同)

喊,即係老細落柯打。只要我滿足到老細的需要,佢就唔會詐型。就係咁簡單?你真係太睇少做父母呢份工喇!實情係,有啲情況老細無叫你做,你都要識 Do㗎!

陳子豐專欄(3):做人最緊要識睇老細眉頭眼額⋯

有一次,老細好安靜咁坐喺佢將大班椅上(High chair),眉頭深鎖,冇岀聲,只係直直咁望住我。我二話不說望下個鐘,下午三點,一小時前飲完奶,好可能係VeeVee,檢查片片,雖然條片唔算好脹,但係條線變咗綠色!

OK!明白!即做!嗱!老細冇落order我會用個腦,read吓佢啲微表情,仲唔係醒爬?

加上經過咗兩個星期訓練,我對換片片呢個工序都相當有自信。打開條片,攞起一塊濕棉花,準備清潔。當我隻手移到去正上方,我 feel 到一陣暖流在手指間流動,滴達滴達。原來仲未完事,老細好孝順咁斟咗杯茶畀爸爸。

作為一名好員工,無論發生咩事都應該保持正面態度。老細依然皺住眉,全神貫注咁望住我。檢查一下,剛剛杯茶只係整濕咗肚腩仔同埋那張本已變綠的片片。抹乾淨,攞起條片片。正想攞條新片:滴達滴達...又嚟!?第二杯普洱!

無論有幾無理取鬧,老細就係老細!沉住氣!我點都唔會對老細發脾氣!只能怪我摸唔清老細的想法。老細無再皺眉,而且仲好大聲咁笑咗一聲,我唯有苦笑住咁整理好現場。脱掉濕了的衫仔,抹乾淨。在大腿內側搽上防疹乳霜之際:滴達滴達...又嚟!?第三杯水滾茶靚!

老細當時手指交疊合上雙手,就好似同我講緊「恭喜發財」,孝順仔斟咗三杯茶俾爸爸,情境簡直温馨。

陳子豐專欄(3):做人最緊要識睇老細眉頭眼額⋯

呢一刻,我竟然忽然諗起:唔知我細個時候又有冇斟過茶俾我爸爸呢?

人生中,唯一一次正式斟茶俾我爸爸,係結婚當日。我仲好記得當我跪在地,望著强忍住淚水的爸爸,我好想同佢講,既然係開心感動的眼淚就即管喊吧,不用怕尷尬,因為我會樓抱住你一齊喊㗎!

諗起當日呢個畫面,又諗起自己而家成為爸爸嘅身份,眼眶濕潤,我索一索鼻:傳嚟咗一陣臭味...

當我意識到有人放屁之際,老細就已經山洪暴發,噴到我成身都係!(由於嬰孩只飲奶,所以PooPoo都是液態的)

“Holy~Shit!!!!!!!!!!"

我第一次講這兩個字講得咁傳神。

喺呢度想多謝陳太,佢聞聲而至,望著全身赤裸的老細同全身PooPoo的老公,忍住笑咁收拾殘局。

PS 1:
從呢件事我學識咗留意老細的表情同肢體動作:
皺眉頭=開小
緊握雙手=開大

PS 2.
唔好意思,講關於照顧嬰兒無可避免會講到屎尿屁,因為每天需要換6至8次片片,請見諒。

 

本文作者:Colin Chan 陳子豐


廚藝了得之暖男一名,今年正式晉級為一子之父。
演藝表演系畢業,旅遊、休閒節目及真人騷主持《歐遊全細界》、《Se7en》、《的士Go》、《吾係本地菜》、《非常食客》等等,曾演出不少廣告及劇集,包括viuTV劇集《詭探》、《已讀不回》、《PlanB》;香港電台《好想藝術》短劇、《獅子山下》《火速救兵》、《那些年那些歌》等

IG: @colintszfung / @babybossjared

advertisement