advertisement

陳太懷胎十個月,我聽得最多嘅說話,你估係以下邊句?

 

A/我真係恭喜你哋啊!
B/仔定囡啊?
C/預產期係幾時啊?
D/有得瞓就好瞓啦

 

冇錯,我聽得最多嘅係啲/「有得瞓就好瞓啦」,附送一抹嘴角向上的奸笑。坦白講,個心都有輕微動搖驚豬過,畢竟我都真係幾鍾意瞓覺。但係我一向都係一個心理質素好好嘅人,覺得只要同老婆有晒共識,通力合作,冇嘢搞唔掂嘅!

 

老細岀咗世住院嗰幾晚,我同陳太都瞓得相當好。老細基本上除咗食奶同埋交際應酬之外,我有咩搞唔掂就會即刻出超必:㩒鐘!充滿愛心的護士姐姐就會接佢走。

 

唔識掃風:㩒鐘
大喊大鬧:㩒鐘
換片:㩒鐘

 

唔好誤會,我好愛阿仔,但係我嘅理性話我聽,岀院後嘅日子有排我捱,何不好好享受岀院前呢幾晚嘅輕鬆呢?經過咗狂煲 Netflix、肚餓就叫room service、好似去渡假嘅三個晚上,快樂時光過得特別快,終於要回到現實。由岳母同大舅充當柴可夫,接我哋三個加一個大喼同一個旅行袋返屋企。令我深刻嘅係,呢趟旅程,兩個人去三個人返。

陳子豐專欄2|有得瞓就好瞓啦⋯

返到屋企執完喼,正想休息之際,老細大叫一聲,我同陳太你眼望我眼……咁應該做咩先啊!?餵奶!?換片!?沖涼!?……好彩!岳母在一秒間做左決定,換片片。但係為了令岳母今晚唔好咁擔心我地搞唔搞得掂,我表演人生第一次換片片。結果好順利,連岳母都讚我手勢唔錯。

陳子豐專欄2|有得瞓就好瞓啦⋯

望一望個鐘,凌晨十二點。

 

換完片,正想休息之際,老細大叫一聲。我冇等岳母岀聲,我就知道是時候餵奶。以為餵哺母乳唔關爸爸事可以去休息下嗎?少年你太年輕了~由於新手媽媽仲未習慣餵哺,所以爸爸最好從旁協助(侍候)。幫老細對準位置,等待適當時機,見老細擘大口,就推佢個頭埋去。陳太無話痛,就即係成功,嗰種成功感就好似打藍球射罰球穿針得分咁爽!每邊餵二十分鐘後。

陳子豐專欄2|有得瞓就好瞓啦⋯

望一望個鐘,凌晨一點。

餵完奶,正想休息之際,陳太大叫一聲:「掃風」。好彩幫老細掃風唔算難,將佢擺好坐姿,拍兩下就吐氣,拍多十幾分鐘就吐奶,完成。

望一望個鐘,凌晨一點半。

掃完風,正想休息之際,老細又再大叫。換片餵奶掃風,需要做的都做了,咁應該係扭抱。老細可能已經發現週遭環境同醫院好唔同,所以無安全感。我用張包被將佢包到實一實,抱住佢行來行去行來行去,終於瞓左。

望一望個鐘,凌晨兩點半。

我冲完涼,正想休息之際,老細醒左大叫。冇理由架!?我明明做齊所有嘢,點解仲喊呢!?

望一望個鐘,凌晨三點。

初生嬰兒,每日食六至八次,每三小時一餐。
對上一餐十二點,現在三點。啱啱又夠鐘開始「換餵掃抱」無限loop.............

 

呢個時候,每一個曾經同我講「有得瞓就好瞓啦」呢句説話嘅朋友,佢哋嘅奸笑聲,喺成間屋內迴盪,久久不散...

陳子豐專欄2|有得瞓就好瞓啦⋯

 

本文作者:Colin Chan 陳子豐


廚藝了得之暖男一名,今年正式晉級為一子之父。
演藝表演系畢業,旅遊、休閒節目及真人騷主持《歐遊全細界》、《Se7en》、《的士Go》、《吾係本地菜》、《非常食客》等等,曾演出不少廣告及劇集,包括viuTV劇集《詭探》、《已讀不回》、《PlanB》;香港電台《好想藝術》短劇、《獅子山下》《火速救兵》、《那些年那些歌》等

IG: @colintszfung / @babybossjared