【#shemomCeleb】2孩爸爸陳柏宇曾歷兩度失胎更懂平常心！兩女教法大不同？開放式說教：堅決不做「呷醋」外父

圈中有「寵女狂魔」之稱的陳柏宇（Jason），與太太符曉薇（Leanne）如今育有6歲的Abigail和2歲的Audrey，組成4口快樂之家。問到曾經歷兩度失胎之痛，才有細女的出現，他反而變得更平常心。陳柏宇為了湊女上學決心早睡早起，更乘勢開展了每天早餐直播之路，增添親子時間的同時，與粉絲公開生活日常。今次「寵女狂魔」帶著女兒一同受訪，談及教女事暢所欲言，分享兩女教法大不同，十分著重注入家庭概念，他大讚大女一事超懂性；更大談將來面對女兒拍拖話題，強調絕不做「呷醋外父」！快將父親節，問到囡囡Abigail有甚麼準備，她隨即仰起頭給爸爸一個香吻，連忙向妹妹親吻，相當甜心呢！

曾歷兩度失胎更懂平常心

要數圈中曾「共患難」的夫妻，陳氏夫婦也是其中一對。二人在誕下大女Abigail後，這數年間曾經歷兩度失胎之痛，一次是因宮外孕大出血，最終要切除左邊輸卵管終止懷孕；而第二次則在3年多前不幸地懷上患有愛德華氏症胎兒而終止懷孕；不過，他們最終能如願「追多個」，如今組成了4口快樂之家。

問到Jason在失胎後才有細女的出現，更覺珍貴？他卻輕鬆地答：「我諗你好難更加珍惜，有個小朋友無論喺咩情況下，都係珍惜！」他續說：「唔會啦，咁容易有（懷孕）應該不關事嘅。又沒有（更珍惜），反而可能會平常心多啲，尤其係我，唔係陀嗰個，我更加平常心，我將所有嘅情感都會喺BB出生後先釋放出嚟」。

兩女教法大不同

對於教養，沒有一套特定的方法，邊教邊學做父母。陳柏宇都一樣，在兩女的方法卻很不同。他表示：「真的會有分別！第一個（女兒）有種trial and error的模式，在她身上唔work嘅，就用一啲唔同嘅方法教細妹，而且現在有咗細妹，同一時間要教兩個（女兒）嘅時候，有時候要教家姐要照顧妹妹多啲，因為妹妹依家仲細，唔識理解，我想真係要到3、4歲先可以理解多啲。」

與太太遇上意見分歧 

不少家長夫婦都認為教養、思想要一致，但問到陳柏宇秒回：「我唔認同一定要一致喎！」他續說：「我唔知點先可以完全一致，你只不過最終係兩個一齊找出一個可行方法，或共同地作出解決方案。」他還分享了與太太的相處，「有時媽媽（太太）好堅持一件事，我就不堅持，冇必要堅持。但如果我堅持一件事，媽媽（太太）又會自然會不堅持；其實最重要係識睇對方眉頭眼額，作為一對夫婦、又係teammate。」教養也好、夫妻相處也好，大概都是如Jason所說：「要識睇對方眉頭眼額做人」嘛！

大女充當和事佬

說到識眼眉頭眼額，不只陳柏宇夫婦，也「遺傳」了大女？陳柏宇從小灌輸女兒家庭概念，而大女Abigail也很愛「家」。他表示：「有一次媽媽唔開心、嬲，佢話自己瞓上面，家姐就叫佢落嚟一齊瞓。媽媽問『點解呀？』家姐話要一家人先至好嘛！嗰吓我覺得好『正』，第一因為佢（大女）幫忙解決一啲heated situation，第二佢有呢種mindset幾好。」Abigail才6歲，相當懂性呢！

你是「呷醋」外父？

女兒是爸爸的前世情人，怎捨得她有「新歡」，有人說：「女兒不到28歲都唔準拍拖」、「結婚唔準搬離太遠」⋯⋯ 正是兩女爸爸的陳柏宇，相信也逃不過這命運，到底他是不是一個「大醋酲」呢？

相反陳柏宇認為「叫佢根本冇可能發生」，與其問東問西，他反而退一步：「你愈唔俾佢有（男朋友）她就愈收埋，我希望佢會開放和誠實。當然，我唔可以太在乎，你俾佢知道你愈在乎，呢件事她就愈容易想反（叛），或者對那件事特別注視，所以我要好chill，盡量唔提呢啲，直至發生先發生。」他強調不會想太多，「我都唔知道，到時先算啦！平常心，因為一定會發生，唔到你唔平常心」。

PRODUCER｜Mabel Shek

VIDEOGRAPHER｜Tik Tsang、Ryan Hong

VIDEO EDITOR｜Yung Wu

PHOTOGRAPHER｜Ryan Hong

MAKEUP｜one tung @onetung

HAIR｜Aki Choi @akichoi 、@alexso_theattic team’s

VENUE｜Jello & Mellow（ @jelloandmellow）