- hot topics
- by 媽媽護士長
- 10/02/2021
以個人經驗，其實喺英國搵護理嘅工作，一啲都唔難。
只要去 indeed 之類嘅搵工平台 search 「nursing」，就發覺好多呢類嘅職位空缺。
我初時搵工去呢個平台搵 idea，咁啱就見到自己屋企附近有一間 agency 請 HCA， 於是就 send CV去試下。好快第二日已經收到電話約見 interview，亦都成功咗加入佢哋做咗 agency HCA。其實一路做一路我都有再留意醫院或者係屋企附近嘅院舍有冇職位空缺。
過咗幾個月，見到屋企附近醫院請 part time respiratory practitioner assistant， 一個星期返 20 個鐘，仲要係 band 4，心諗合晒我要求。而且本身我又係 resp 出身，唯一佢嘅要求我冇嘅，就係要有最少一年係英國 respiratory 病房工作經驗。
不過點都好，send 咗 CV 去試下都冇壞啫﹗之後都收到佢哋邀請去 interview，interview 時有一個 nursing lead，兩個 respiratory 嘅護士。雖然佢地係請一個 assistant 位，但要求都幾高，居然要答 GOLD guideline 嘅嘢。好彩我仲記得，之後就好casual 咁樣傾下偈交流下意見。因為佢哋都想知道香港嘅 practice 係點，咁成個 interview 就傾咗大概 45 分鐘。
到下午就已經收到電話，係 nursing lead 親自打嚟話畀我聽，雖然 interview 時好好，要求亦好合佢哋心意，但係始終我冇喺英國病房做過，咁就錯失咗一個機會啦！當時諗，不如真係去病房做下，等下一次機會嚟嗰陣時就唔會錯失。所以我就開始留意屋企附近間醫院有冇適合嘅職位空缺。
未等到醫院有空缺時，又咁啱見到屋企附近間 nursing home 請 part time HCA， 於是我又 send CV 去試下，好快就收到電話去 interview。
今次會面，就有一個 nursing manager 同埋 一個 RN interview 我。我見佢哋已經有一 set問題喺張 interview form 上面，主要都係問一啲 scenario 嘅問題，好似如果你照顧嘅院友咁樣咁樣或者係你見到同事做錯嘢，你會點處理呀？
咁第二日又已經收到 manager 嘅電話話我 interview 成功啦！可以交啲資料畀 HR。可惜最後我都冇喺呢間院舍工作，原因係因為 HR 話佢哋未曾請過這類 visa (dependent visa) 嘅人，所以唔肯定得唔得， 最後就拒絕咗我嘅入職申請。
之後就見到屋企附近間醫院請 bank clinical support worker，係 NHS 醫院，咁就係要係 online 填佢哋張 form，好多嘢要填㗎！
咁冇幾耐又係收到通知去 interview。今次就好簡單，係得一個負責 staff bank 嘅 nurse 去見我，都係傾偈嘅形式進行，問下你點解嚟咗英國住呀？如果病房發生咁嘅事你又點處理呀？有冇計劃做番 nurse 呀？咁之後又好快收到通知面試成功，並可以約 HR 搞入職手續。
以我上述經驗，護士在英國搵工機會可以話係相當之多，亦一啲都唔難，有心一定搵到，希望大家加油啦﹗
本文作者：媽媽護士長
兩子之母，護理學碩士畢業，任職公立醫院護士超過十年，曾經於最前線對抗沙士疫症，及後晉升醫院護士長。因懷有提升香港護理行業者質素之理想而開展教育事業，於多間專上學府擔任護理系講師多年。現移居英國並於當地成為註冊護士。
fb @ HKnurseUK
