趙榮德分享3個小一面試扣分位！父母都會影響面試成績？

6月是叩門面試的季節，小一面試進行得如火如荼，前喇沙書院副校長趙榮德提醒父母，在準備面試的同時都要留意以下幾個面試「扣分位」，以免被學校「暗地」扣分了卻仍然懵然不知！

趙榮德分享小一面試扣分位1：跟別人吵架是大忌

趙榮德憶述一位媽媽的親身經歷，「小朋友面試時明明樣樣做到足，但最後都係入唔到心儀學校，媽媽覺得好奇怪，細問之下先發現小朋友在捉棋環節時，同另一個想「回棋」的小朋友發生衝突，結果有份發生衝突的小朋友全部唔合格。」趙榮德表示，小朋友在學校範圍內跟其他人發生衝突是「大忌」，好似排隊時唔小心比人踩到一腳就即刻興師問罪，或者大哭大叫，處處不饒人的態度，其實就係反映小朋友無家教，所以如果學校發現小朋友同人發生衝突，面試一定會「扣分」！

佢提醒，面試由你踏入學校範圍已經開始，「唔係入課室面試先開始計分，有學校面試前會俾小朋友去一間房自由玩遊戲同睇書，會有個老師同小朋友傾計，佢一定要有回應，就算怕醜唔出聲，都一定要有禮貌！」佢更提醒家長，等待面試時，要留意小朋友的言行舉止，好似有無戴好口罩都好緊要，「如果個個都戴，係得你唔戴，老師見到自然會對你印象差。」

趙榮德分享小一面試扣分位2：父母都有機會被扣分

學校面試其中一個環節父母也要在場，目的是想了解家庭背景和理念是否跟學校相近，「如果家長在面試時嫌三嫌四，意見多多，好似一入去面試坐低就話熱，要開大個冷氣；又或者搶住答問題，唔比機會小朋友出聲，就好大機會扣分。」他坦言，父母去面試記得唔好口多多，彈三彈四！另外，父母面試衣著一樣有扣分位，「面試最緊要尊重場合，著得太好，刻意著到成身名牌；或者著得太休閒，著牛仔褲或者牛仔短褲都係大忌！」

趙榮德分享小一面試扣分位3：禮貌和學識同樣重要

父母準備面試時，不要一味準備學術上的知識，小朋友的禮貌一樣重要！佢指：「小朋友知識不夠，但如果他態度正面，是可造之材，都有機會取錄，但學校不是禮儀學校，是教授知識的地方，如果小朋友無禮貌，學校好難可以教得好，因為家教同禮貌好大程度係家庭影響。所以小朋友面試時表現再好，如果無禮貌，很大機會會扣分！」

趙榮德溫馨提示：面試唔識答問題　點算好？

面試準備得再足，都有可能遇上唔識答的問題，佢表示，唔識答唔緊要，最重要是要堅持到底！「如果面試有三個小朋友都唔識答問題，一個試都唔試就放棄；一個嘗試一會便放棄，最後一個堅持到底，老師一定會收堅持到底的那個學生，因為永不放棄係成功人士的特質，好似Steve Jobs都係一直堅持先獲得成功。」