提提屋企人:五個流感高峰期避免帶小朋友去的地方

近日流感肆虐,不少公立醫院都爆滿,即使有病要睇醫生都唔容易。今日教育局宣佈全港幼稚園停課,雖然媽咪們可以放心一點,但小朋友不會留在家中,更需要周圍放電,若你的小朋友由家中傭人或長輩照顧,要提提他們盡量不要去以下五個地方,即使帶小朋友去玩也要提高警覺,去完快快洗手,回家洗澡,以防病菌傳播!

 

流感傳播熱點第 5 位:兒童中心 / 圖書館

暑假期間,唔少小朋友都會去兒童中心或者圖書館歎吓冷氣打發時間,但係呢類場所小朋友多,身體接觸更多,而且玩過嘅玩具、圖書都有機會沾染細菌,呢幾日都係暫時唔好去住喇。

流感傳播熱點第 4 位:商場玩具部

商場玩具部係小朋友平時最想去嘅地方之一,不過成班小朋友一齊玩玩具,玩具整沾染細菌又冇人知,所以近期都係少去為妙。

流感傳播熱點第 3 位:兒童遊樂場

雖然室外嘅遊樂場空氣流通,但係咁多小朋友聚埋一齊,一定有身體接觸,都好容易傳染病菌。

流感傳播熱點第 2 位:室內遊戲室

商場嘅playroom,以及市政大廈嘅室內遊戲室,係好多小朋友暑假嘅放電好地方,但係即使定時清潔,亦難避免小朋友身體接觸。小編嘅仔仔就試過連去兩日去室內遊戲室,之後患上甲型流感,其後住院一星期先退燒,所以去呢類地方要十分小心注意清潔。

 

流感傳播熱點第 1 位:波波池

波波池可以話係年紀較細嘅小朋友最鍾意去嘅地方,但係亦係病菌溫床。數以百計嘅波波,即使每日清潔,期間亦難免沾染小朋友嘅口水,盛載細菌嘅能力簡直係兒童玩具之冠。呢兩個星期流感高峰期,真係唔好冒險帶小朋友去波波池喇。

advertisement