advertisement

呔媽Kelly男人埋單找數天經地義

啱啱響Facebook見到個幾得意嘅Topic,見到有網民拗到火紅火綠,我又從未寫過呢樣嘢,同大家討論下先!

事源係FB有個Page,講我哋呢啲中女對唔同事物嘅睇法,間中又會有我哋曾經少女果啲回憶,都幾有共鳴。有個PO就講中女佢響餐廳見到年輕情侶,以AA制埋單仲計得幾盡下,加上個男仔掛住打機唔係太理個女仔,中女有感而發,覺得咁樣拍拖好似少咗啲戀愛feel,但可能時代唔同了,睇慣咗就見怪不怪吧。

中女個PO一出,當然引嚟網民討論。一方就覺得呢種男人跟唔過,拍拖都計得咁清楚,結婚點算?唔會忍受另一半同自己咁樣計法,亦覺得呢種男人冇擔當。另一方當然就是支持AA制,覺得冇問題,大家計清楚仲好,只要雙方舒服就得,唔代表唔愛錫對方。其實拍拖AA制,呢樣嘢都真係幾個人的,接唔接受完全係佢哋兩個人嘅事,所以就有拍拖呢個過程,用一段時間去了解大家拍拖方式同喜好,夾到就一齊,夾唔到就分開,係好正常的事。

呔媽Kelly男人埋單找數天經地義

我老公睇完,問我點睇呢單? 如果你問我自己諗法,我一定係老套,慣咗另一半埋單,慣咗被照顧。唔好話食飯,甚至平時買嘢,我都係慣咗對方畀錢,同埋幫手拎重嘢各樣,都會係男仔主動幫忙。呢個可能真係年代唔同,我哋細個出街,啲男仔一定爭畀錢,唔好話拍拖,就算連朋友,都好多時會係男仔們埋單。而我哋果個年代嘅男子,無論係拖友,或是大哥哥輩,都有種照顧女仔嘅責任感響度。唔知係咪真係睇得江湖片多,哈哈!男人係好man㗎喎,覺得咁大個人,出街點會要女仔使錢㗎? 冇錢佢哋寧願唔出街,寧願齊齊食老麥,都唔會同你AA制,要女仔畀錢,佢哋覺得冇面。而可能我從小活在寵溺之中啦,朋友堆中年紀最細,小妹妹的我更加唔使旨意爭埋單,但在我嚟講呢個唔係話錢唔錢嘅問題,而係形成咗我會覺得一個男人有冇風度。咁當然,又唔係話男人唔埋單就冇風度,講到尾拍拖係兩個人相處,大家夾到,開心就OK啦!

 

至於老公,可能係同年代的人,佢同我諗法一樣,除非自己真係負擔唔到,否則都係慣咗同女仔出街食飯會埋單,就算唔係女朋友都會,其實都係男人基本禮貌。就好似男人係要幫女人拎重嘢一樣,其實正常你見到任何人有需要,都會幫忙,都已經唔關乎果個係咪你女朋友,定係其他人。

不過老實講,呢個年代係少咗好多呢種風度嘅,你見到而家嘅人好少理會身邊人,行過連門都唔會幫你推一推,見你抱住BB又唔會讓位畀你坐,連最基本搭巴士搭哋鐵嘅禮儀,都要專登搵阿Deanie姐教一次,所以都唔可以再同以往相提並論。學中女話齋,就當係我哋老套,跟唔到而家個潮流吧!