advertisement

近日香港嘅政局動盪,無可否認嚇怕咗一眾香港市民,然後,唔少人諗到移民呢條出路。無論係單身男女,定有小朋友嘅家庭,都希望兩手準備,為未來生活鋪條後路。見網上唔少文章講到移民後嘅生活,講到大家要面對唔同嘅困難,有咩心理準備等等。移民廿幾年,我反而覺得,如果你真係認為留響香港已看不到美好將來,咁可以走嘅,應該要走,點解要擔心咁多未知嘅嘢?

 

走唔走,走去邊,都係個人選擇。如果你問我,移民有咩要注意,我會話係有足夠嘅儲蓄。一個人又好,成家人又好,要移居一個新地方過新生活,其實唔難,特別是而家科技先進,唔好講到一去不返,永不回頭咁樣,而其實美加呢啲地區唔同日本,係可以 keep 兩個國籍㗎!但唯一我覺得真係要預備嘅,係你唔知你運氣如何,可以見極工都冇人請,又可以好似我有朋友咁,嚟咗美國唔夠一個月已經受聘,人工仲幾高,出14個月糧有花紅,重點係返工對香港大陸客,講中文仲多過英文。

呔媽移民回憶錄

老實講,當你計過度過,有足夠生計食同住,已經可以考慮移民。文化生活上嘅嘢,好睇你個人性格,你樣樣嘢都諸多嘰咭嘅,去到邊都係慘。唔係講笑,我覺得香港人可以話係適應力最強,求生能力最高嘅一種人。以我自己嚟講,當年十幾歲細路女,一下子由一個正常香港家庭,食飽飯媽咪仲餵緊生果我食嘅,一句話移民,畀媽咪掉咗過嚟讀書(佢自己就走咗返香港喎),租間房仔打地舖,廚廁仲要同啲鬼佬公用,果部千年洗衣機我淨係敢洗出街衫,底衫底褲我自己用手洗㗎,想唔想像到?唔係人人移民都住睇戲果啲美式大屋,前後花園㗎!

 

你以為咁樣好慘?No la, 我哋當年成班細路,好多都住呢啲,一唔係就黐親戚住。美國紙水高,當年間房計返港紙要6,000蚊一個月租,講緊廿幾年前喎,加上媽咪單拖帶住我同阿哥出走,真係唔容易,絕對理解。而家望番轉頭,會覺得,當年都幾勁㗎喎!高中係咁樣渡過,到大學喇,同啲同學夾份租間屋,又係一條好漢啦!提一提,當年好多朋友,係響完全唔知嘅情況下,以為去美國旅行,點知畀屋企人掉低,簽學生VISA返埋學,長居於此(冇身份,出咗境入唔番嚟),要到結咗婚入埋美籍,先可以再踏足香港,呢啲就真係慘慘豬喇!

呔媽移民回憶錄

其實一個人嘅性格,係好多嘢結合而成嘅。我諗我習慣隨心而行,不拘小節,又咁樂觀,呢啲都係當時面對嘅環境衍生而來,唔係點可以一個人湊住兩個仔都從容不迫,哈哈!好多嘢我唔會太思前想後,諗嚟諗去咁多顧慮,反而令自己卻步,做咗先囉!唔行出果一步,你永遠唔知往後係好係壞,所謂人算不如天算,最緊要,身邊人同你同步,有事一齊面對一齊解決。香港人,加油!!