呔媽專欄#269|新型肺炎席捲美國:佢哋終於識停課!

美國呢邊因為新型肺炎肆虐,今個星期終於實施停課,Bayarea 中小學校區同時停課。由於各校區放 Spring Break 時間不一,有啲學校會停三個禮拜,我哋連埋假期會停一個月,四月中先復課。不過到時會否如期復課都要因應疫情,美國而家先開始爆發,睇嚟會有一段時間。唔計其他州份,而家剩係我哋 Bayarea 每日都有十幾廿單確診,講緊係已確診,有幾多人排緊隊等待化驗都未知,加上演員名人、籃球員、足球員、消防醫護,甚至各國高官相繼確診,而三藩市所有大型活動,就連 NBA 球賽都因此取消,佢哋終於意識到唔係美國人口中嘅同流感一樣咁簡單,疫情的確非常嚴重緊急!

呔媽專欄#269|美國新型肺炎肆虐,佢哋終於識停課!

響美國未有社區感染嘅時候,我已經戴口罩出街入貨,個個用歧視眼光望我,我唯有扮兩聲咳扮病,等人覺得我唔係驚得咁誇張要戴口罩。事實上,我真係驚呀!我哋香港人經歷過 SARS,知道點樣保護自己,同時保護別人,香港人今次自救行動做得好好,齊心防疫,係抵讚!因此我響兩個仔嘅學校,同外國人老師開會時都講,點解香港咁近個中國呢個源頭都咁少確診數字?因為全民戴口罩,keep 住洗手搓手消毒,唔摸眼口鼻,亦自我隔離減少聚會。當全民一齊做,的確係好有效㗎!我哋響美國都應該效法!不過美國政府太睇小呢個疫情,根本完全冇預備任何防疫用品畀市民,響街舖已經買唔到口罩,消毒用品亦欠缺。可能係咁,所以一直強調唔需要戴口罩,引致疫情爆發失控,因為就算政府話要戴,根本完全冇得買!

呔媽專欄#269|美國新型肺炎肆虐,佢哋終於識停課!

就響校區同衞生局達成停課決定前,我已經首先自行停課。因為每日都收到新聞消息,附近中學小學一間一間咁中招,之後再消毒停課 ,睇到個政策係爆一間停一間,真係好有坐以待斃嘅感覺。問咗學校自行停學,會唔會當曠課處罰,佢哋話唔會,我當然選擇留兩個仔響屋企,避得道避啦!可幸過咗兩日,校區就宣佈停課,唔使等我擔心下星期仲返唔返學。相信我哋而家經歷的,香港家長們已有經驗,我都好希望美國人可以效法香港人,齊心抗疫,注意個人衛生,不外遊不聚會,等疫情快點過去。大家都要保重!祝大家平安,健康!

 

呔媽 facebook page: 騎呢.weak7.卜車呔

 

advertisement