呔媽專欄#270|人在美國,肺炎期間面對排華現象

自從新型肺炎傳播到世界各地之後,外國好多地方開始排華。即係白人同其他非華人種族,都因為仇恨呢個病毒而憤怒,針對華人,出言侮辱欺凌,甚至出手襲擊。自此發生後,好多香港親友都提醒我哋身在美國,呢排出入要小心,以免受害。

呔媽專欄#270|人在美國,肺炎期間面對排華現象

我哋居住三藩市,暫時排華情況唔算嚴重,因為三藩市始終係大城市,聚集多國種族,多樣文化,因此人民對不同種族嘅接受度較高,唔會話一有咩事就即刻癲得好緊要。再講,要排華都要有一大批人同時去排斥亞洲人,就以三藩市比例,白人佔 46%,亞洲人佔 34%,其他種族 20%,一街都係亞洲人,要集體排華唔係咁容易。呢個亦係我之前響 shemom 寫過關於移民外國嘅文章,我認為香港人最好移居去比較多種族嘅大都會城市,例如美國嘅話,三藩市、洛杉磯、紐約等。唔好移居美國小鎮,少華人地區,因為白人主義嘅地方係唔喜歡外地人來擾亂,而當有咩事發生,就好似今次咁樣,小村小鎮嘅華人,就好容易會被當地人排斥,被欺凌。(昔日文章:呔媽專欄#232|海外升學揀啱地區,容易融入當地社區

當然,今次新型肺炎搞到咁嚴重,美國停工停市停課,社會癱瘓咁滯,華人被外國人當出氣袋一定會有。好似之前疫情初期,我媽咪戴口罩搭公共巴士,被一個鬼佬跟尾狂鬧,佢唔識英文唔知佢鬧咩,估計都係鬧你哋啲中國人傳播病毒之類。唉,而家疫情嚴重,我就叫媽咪唔好再出街了,只可落樓下超市買嘢,唔好四圍去,一來多菌,二來無謂成發洩對象。

呔媽專欄#270|人在美國,肺炎期間面對排華現象

琴晚睇到另一條短片,就響我哋附近成日去嘅超市,都不是美國人超市,顧客種族聯合國咁樣的。短片中有個白人男人,狂鬧另一亞洲人男人,叫佢走,離開超市!然後又一兩個外國人幫白人,又有一個外國人幫亞洲人,總之就大家鬧嚟鬧去,好似話係亞洲人有咳,白人即刻發癲叫佢走,好明顯係種族歧視,乘機發洩。最後超市警衛嚟到,講咗幾句拉開咗兩個人,散場。相信呢啲事,嚟緊都會繼續發生。如果亞洲人冇做錯事,我又覺得唔可以因為疫情,就要全國亞洲人被欺凌!希望大家人在異鄉,可以守望相助,一同面對逆境,一定要團結,先可以保護自己以及家人朋友,以減少被外國人欺凌嘅情況。

 

呔媽 facebook page: 騎呢.weak7.卜車呔

 

advertisement