呔媽專欄#272|在家抗疫夫妻關係大考驗

呔媽專欄#272|在家抗疫夫妻關係大考驗

因為新冠肺炎嘅關係,政府要求美國市民進行 shelter in place,即係大家必須留守家居或室內,如非必要不可外出。咁做除咗係保障市民安全,免受病毒感染,亦同時保護辛苦抗疫嘅醫護人員,減低個案,變相減少對佢哋生命威脅。而家所有學校已停課,轉為網上學習,同時大部份人已開始 work at home,如全民合作,呢個會係一個好好嘅截龍方法。

 

我哋由 3 月 20 日開始 shelter in place,到而家大約 4 個禮拜,原來響大家家居隔離嘅同時,又衍生咗另一個社會問題,就係家庭暴力。以三藩市為例,居家隔離令生效嘅第一個禮拜,家暴求助個案數字已比去年同期激增 6 成。有協助家暴嘅組織表示,因為呢個家居隔離令,令受害人同施暴者共處比平時更長時間,以致受虐求助個案大幅上升。

 

最有效又折衷嘅方法,當然係受害者唔再同施暴者共處一室,但唔係人人有能力或有地方搬離住所。因應呢個問題,三藩市市長,就預備咗少量住宅,畀受害者們暫住避難,而報警嘅911熱線,亦增設咗短訊報案熱線,方便打唔到電話報案嘅人,可以轉用短訊報案。

 

響度講家暴可能嚴重咗啲,但我同意響家居隔離呢段日子,好多家庭兩公婆嘅相處,或多或少會出現問題。唔一定係去到發生暴力事件,而係大家多咗時間共處,需要嘅包容同遷就突然比平時多咗。加上小朋友平時返學時間長,停課期間需要親身教導,情緒難免受影響,一時三刻真係會唔識點樣面對。

 

好似近排同朋友傾開,會聽到話就快忍唔住個老公,多咗好多意見分歧,成日黑面,講咩都唔岩聽等等。其實呢啲相處問題可能本身都有,但因為共處多咗,問題就明顯咗,同埋無可避免要去面對。我反而覺得,一個家庭,平時可能好少時間可以溝通相處,而家兩公婆一齊抗疫,又同小朋友多咗親子時間,可以乘機改善下同屋企人嘅關係。特別是同小朋友相處,佢哋大得好快,10幾歲步入青春期,有自己世界,就未必會再咁黐身,真係要好好珍惜同享受呢刻!

呔媽專欄#272|在家抗疫夫妻關係大考驗 呔媽專欄#272|在家抗疫夫妻關係大考驗

老生常談,呃呃騙騙又一世,對住老公老婆,其實好口啲絕對係維持夫妻關係嘅要訣!人人都鍾意聽好說話,那怕肥老婆都可以讚佢好攬(而事實上佢嫁畀你時係好索!),唔靚仔老公都可以讚佢有型又man(你嫁佢時梗有吸引你嘅地方吧!)對方把口話你亂講,但個心肯定是甜,下一句總唔會同你針鋒相對卦!我當然同意,所有嘢都就晒老婆就冇錯架喇,鬧交一定係先講和,老婆永遠是對的。所謂 Happy Wife Happy Life! 你老婆開心,你都有運行!但老婆們亦要緊記,婚姻係兩個人去維繫,相處係大家都要付出,只一方不停付出,長久下來,又容易產生問題了。

 

呔媽 facebook page: 騎呢.weak7.卜車呔

 

advertisement