advertisement

呔媽專欄#273|居家抗疫慎防意外

上次提到,美國呢邊進行家居隔離一個多月,令家庭暴力個案急升(昔日文章:在家抗疫夫妻關係大考驗)。今次又提醒大家另一個家居隔離嘅隱患,就係使用消毒劑中毒個案同樣急升。美國 Center of Disease Control and Prevention 報告指出響今年頭三個月嘅個案率,比上年及前年同期急升 20%,直言因為新冠肺炎嘅關係,市民高量使用消毒用品所引致。同樣於 Control Center 收到嘅查詢來電,亦比去年同期急增,現美國已收聽多於 45,000 個電話關於消毒劑中毒問題,而且近四成係關於 5 歲或以下嘅兒童中毒。

我哋過去呢一個月,因為家居隔離嘅關係,一家大小留響屋企嘅時間甚多。就以我自己為例,門口一支高濃度消毒酒精噴鞋,噴門鎖開關手柄;入屋又一支 Lysol 消毒液噴出過街嘅衫褲;廚房及廁所各一支消毒液噴地面,噴廁塔;車房又一支消毒液噴買番嚟嘅用品及食物包裝袋,又或是收送貨品。基本上,全屋都係消毒用品及消毒濕紙巾。我就話兩個仔已經大個,唔會走去搞啲消毒用品,但屋企有幼童嘅家庭,其實真係多咗好多機會中毒。呢個時勢,屋企個個顧前顧後,父母消毒完冇擺番好支噴劑,一時睇漏眼,幼童噴咗落眼口鼻,甚至飲埋落肚,真係隨時發生。

近日,響紐約就有個案,小童飲咗支捽手液落肚,頭暈眼花,撞落枱角跌傷要入醫院急救。又有個女人因為將漂白水稀釋,溝埋白醋同熱水嚟浸洗蔬果嘅時候感到暈眩,懷疑吸入性中毒,要送院治理。亦有人因為用酒精搓手液後接近火種而起火,酒精係易燃物品,一定要遠離火種!!幼童中毒,當然係要靠我哋大人自己小心處理,用完嘅嘢擺高處,唔好畀佢哋接觸到。而我哋大人就真係避不了瘋狂消毒,唔想中毒又應該點做呢?

首先,最重要係:環境通風!唔好焗住自己響一個空間入面消毒物件,必須空氣流通,減少中毒機會。另外就係自己嘅防護,可以戴口罩先噴消毒劑,或者 1:99 稀釋漂白水去殺病毒。我自己好懶響屋企戴口罩,只會開大啲窗門,但發現噴多幾次消毒後,開始覺得條氣唔順,要大力深呼吸先舒服,相信同吸入消毒噴霧有關,真係唔好懶,要戴番個口罩喇!

呔媽專欄#273|居家抗疫慎防意外

除咗戴口罩,戴手套同長袖衫遮蓋皮膚都係有需要。重點留意嘅係消毒劑千祈唔好噴向自己塊面同皮膚,因為裡面成份係有效殺死病毒嘅化學物,接觸皮膚會有敏感反應,或引起更嚴重皮膚病。而肺部吸入噴霧亦可能引致中毒。另一點想提醒大家,係要小心處理稀釋消毒劑,最好跟衞生署指引去做,唔好自己亂咁溝啲嘢出嚟消毒,因為溝出嚟嘅液體可能有唔同毒性,接觸後會引致皮膚中毒或吸入性中毒。最後,亦係我哋常用嘅酒精搓手液,記得搓手後,響酒精完全揮發掉之前,千祈唔好接近火種!而最好嘅潔手方法,當然係清水加洗手液。洗手20秒啦!共同抗疫,大家朋友就得互相提醒,祝大家平安過渡!

 

呔媽 facebook page: 騎呢.weak7.卜車呔