advertisement

英國置業Jason Ou(13)【英國放租投資小心地雷處處】

英國置業Jason Ou(13)【英國放租投資小心地雷處處】

之前同大家分享,點樣喺樓宇出租方面可以慳番一部份中介費,同埋正確選擇中介提供嘅出租服務(tenant find, rent collection and full management)(昔日文章>>英國置業Jason Ou (11)【英國買樓收租賺到盡秘技公開】)。 今日同大家分享一下身在英格蘭嘅租樓小貼士。

英國有20%人口喺英格蘭租私樓住,數字大約係460萬,當中未計政府樓。每年新建嘅樓宇供應需求,一直都係處於龜兔賽跑嘅狀態,所以英國本地人先租後買都已經習以為常。既然樓宇租務市場咁龐大,當然有一系列嚴謹嘅法律去保護租客權益,所以房東一定要做足功課,以免不必要嘅法律或金錢糾紛!

租客搬入嚟之前,房東/中介一定要向租客提供一份政府編輯嘅小冊子《How to rent》(18頁紙)。內容大致係房東同租客喺出租任期內,各自應負上嘅責任及注意事項,我揀咗幾個重點同大家分享一下。

房東每年要做煤氣檢測

租客方面就比較簡單,基本上就係準時交租,同埋盡量keep住個單位in good condition(自然損耗 wear and tear 除外)。另一方面,房東應該履行嘅義務就比較多,如果個單位有用到煤氣的話,例如熱水器(combi boiler)、煤氣煮食(gas hob)、壁爐(fire place)等,房東每12個月就要定期做煤氣檢測(gas safety check), 費用為£100-£150,pass到就會有一張 certificate。萬一唔記得檢測而有煤氣洩漏,而涉及到人員傷亡的話,房東就要賠錢,仲有坐監風險。

今個月新例:每5年做一次電力檢測

從今年的4月1日開始,政府勒令房東/中介更需要每5年做一次電力檢測(electrical installation condition report - 簡稱EICR),費用為£150-£400。好多舊樓電路多多少少有問題,或者不符合規格,例如 RCD box(fuse box)要更換。電工檢測樓宇之後會出一份報告,入邊如果有涉及到任何C1 code(高危風險)事項,業主一定要於28日內更換!

按金不可多於5 week’s rent

關於按金deposit,從2019年6月1日起,無論租客係學生、高薪人士,或者有寵物嘅家庭,按金嘅金額封頂為5 week’s rent,而且一定要將收到租客按金嘅30日內,同政府機構註冊DPS、My deposit,或者TDS(三選一即可)。如果冇註冊按金的話,租客有權問業主索賠相當於按金嘅三倍金額。

10年做一次能源損耗檢測報告

另外,由2018年開始,業主/中介每10年要對樓宇做一次Energy Performance Certificate (EPC)能源損耗檢測報告。如果rating 等級低於E的話,個單位就唔可以攞嚟出租,要做少少improvement,例如將老舊嘅燈換成LED,由單層玻璃換成雙層玻璃等等嘅節能保暖小型裝修工程。

以上係租客入住之前業主/中介要提供嘅相關文件,缺一不可!如果未有按照法例提供文件而讓租客入住的話,之後業主/中介係冇權用section 21法律條例叫租客搬走。當然仲有其它出租條例細節方面,我未有一一列羅列出來。

總體來講,英國係保障租客權益方面基本上係做到滴水不漏,懇請各位業主房東做足功課,就可以長租長有,收到一定可觀租金回報之餘,可以遠離煩惱。

本文作者Jason Ou

英國置業Jason Ou (1)【英格蘭買磚頭遇着租霸?】

大學主修經濟,移居英國22年,任職房地產投資行業超過十年,現為英國 Global 32 物業公司創辦人。

 

昔日文章:英國置業Jason Ou

fb@Global32UKproperty