advertisement

資深行為治療師Tiffany:針對5大「扣分位」小一面試行為問題逐個捉

資深行為治療師Tiffany:針對5大「扣分位」小一面試行為問題逐個捉
暑假就快到喇!Miss Tiffany 知道有一班小朋友將要準備考入小學做大哥哥大姐姐。不過,你嘅子女準備好參加小一面試未?等我地一齊嚟個「小一面試之行為問題逐個捉」!

1. 我的小朋友冇自信,又害羞

You’re not alone! 好多家長都有同 Miss Tiffany 反映自己小朋友既安靜又怕醜,仲要好膽怯,咁點算好?

家長可以畀小朋友多參與群體社交活動,等佢哋習慣同其他小朋友相處。不過,咁係唔足夠㗎,家長同時亦要識得引導佢哋與其他人交流。例如:教導子女去主動開展對話,或者主動邀請其他人一齊玩等等。

2. 小朋友玩遊戲輸咗會大發脾氣
資深行為治療師Tiffany:針對5大「扣分位」小一面試行為問題逐個捉

「唔輸得」亦係現今好多温室小朋友嘅通病!Miss Tiffany 都有學生剛嚟上堂嘅時候,輸咗遊戲會有情緒,由喊、到嬲、到踢凳嘅都有!

家長記緊要教導小朋友去認識自己情緒,以及教佢哋用有效嘅情緒控管技巧,咁小朋友先可以喺任何情況下都識得自我管理情緒。學識控制好個人情緒,對建立良好社交溝通能力都好有幫助㗎!

3. 子女做事容易放棄、不勇於嘗試

資深行為治療師Tiffany:針對5大「扣分位」小一面試行為問題逐個捉

呢個簡直係做人嘅大忌!唔好話為咗應付小一面試,如果做人做事都容易放棄,大個咗又如何做大事呢?我哋要教導小朋友千萬不應因為一時挫折,例如輸咗遊戲或者個遊戲好難玩,就耍手擰晒頭唔玩唔參與。你估老師見到會對呢個小朋友,會有乜嘢印象呢?抗壓力低,其實仲會影響到小朋友日後嘅心理健康添!

我建議家長要識得運用有效「獎勵系統」去推動小朋友學習意願,可以試下將困難嘅任務分拆成細小、簡單嘅任務,亦要適時畀小朋友嘗試失敗,先可以幫助佢哋建立成功感,從而提高自信心及自我形象。

4. 小朋友冇耐性又衝動

資深行為治療師Tiffany:針對5大「扣分位」小一面試行為問題逐個捉

小朋友冇耐性會衍生乜嘢行為問題?Miss Tiffany 真係見好多!老師講嘢時會插嘴、老師叫佢等一陣嘅時候就周身郁、一見到玩具就要搶、上堂諗到咩就講咩!咁樣又如何可以於小一面試取得勝利呢?

家長應該喺日常生活中,多啲製造機會畀小朋友學習等待,當佢要求一樣嘢時,盡量唔好畀佢立即得到。

而家諗番轉頭,你或者你屋企嘅工人姐姐,又有冇過度遷就你嘅子女呢?

5. 不能跟從指令

呢個又係好多小朋友都有嘅問題。面試嘅時候老師好多時都會畀指令,甚至需要小朋友玩一啲需要聽指令嘅遊戲。如果小朋友聽指令能力較弱,恐怕喺呢方面都較難得分。

據本人教學經驗所得,有部份小朋友就算平時好聽話,但一去到玩遊戲嘅時候都會頓時忘記晒所有規矩,成個人興奮到飛咗去宇宙,又尖叫又𨂽地,毫無自制能力可言!

所以平時家長都應該多提升小朋友聽指令嘅能力。畀指令後,亦應該馬上跟進小朋友嘅情況,並提供適當程度提示,去幫助子女完成指令。

否則,你永遠都需要講幾十萬次,小朋友先至會聽你講。另外,亦需要製造多啲實戰經驗,畀小朋友學習玩遊戲時應有嘅行為。

最後提提大家,切勿錯過糾正子女行為的黃金時間!若想事半功倍並針對性地改善子女的行為問題,應該尋求專業人士協助。

 

資深行為治療師 - Miss Tiffany

心理學碩士、資深行為治療師 - Miss Tiffany
一對一行為治療/小組課程/學校影子老師服務⁣
│ 相信科學,相信專業 │
𝐄𝐯𝐢𝐝𝐞𝐧𝐜𝐞-𝐛𝐚𝐬𝐞𝐝 𝐀𝐁𝐀/ 𝐏𝐚𝐫𝐞𝐧𝐭𝐢𝐧𝐠/ 𝐒𝐄𝐍 𝐄𝐝𝐮.𝐓𝐢𝐩𝐬
Master in Applied Psychology⁣
PG Cert. in Behavioural Science Technology
BSc in University of Toronto Psychology Specialist

 

fb @ psyc.made.simple

IG @ psyc.made.simple