「一家人」做節當然冇問題,問題係「一家人」點樣定義呢?以下係我連續三個月做節嘅感想……

其實我真心覺得奶奶份人都幾好,嗯,因為佢心地善良,教出一個好乖嘅仔,所以獨具慧眼嘅我先會選中呢個好老公。不過好人即使唔會做壞事,佢嘅行為都可以令人費解,而奶奶作為上一輩嘅人,非常着重傳統,尤其非常着重傳統節日。

 

我感覺自從盂蘭節之後,我嘅「mode」係冇停過。農曆七月陪奶奶參加盂蘭勝會,唔夠一個月又中秋節「中秋節人月俩團圓,點都要一家人食餐飯嘅。」奶奶如是說。

 

「一家人」當然冇問題,問題係「一家人」點樣定義呢?奶奶心目中嘅「一家人」,包括奶奶、老公,同埋我;另外又包括我哋三個,加埋老公阿哥嘅一家三口;亦都包括奶奶嘅父母一家,以及奶奶嘅奶奶一家……而上述嘅「一家人」聚會 x 4,我作為佢新抱,全部都要出席。

 

中秋節完咗,以為可以唞吓,前幾日奶奶又打電話來,約我哋重陽節去拜山。我問老公:「七月十四先陪奶奶去嗰啲盂蘭勝會,重陽節又要拜山?」老公不以為意,佢話由細到大都係咁,慣咗,佢仲加多句「你過多兩年就慣架喇。」即係一定要,冇彎轉囉。

 

以我理解,過咗重陽節就冇乜大時大節喇,一定係,咁農曆新年之前,本尊終於可以唞下喇。