當奶奶愛錫仔仔,佢嘅想法都會同我一樣,好想一家人和睦相處,好想對方對仔仔 / 老公好啲。

好多人都覺得好難處理,我就比較平常心,因為呢個係日常生活一部份,避無可避,亦都唔到我唔理,以下呢幾樣嘢,我就堅持做足。

 

基本禮貌
日常打招呼、過節打電話問候,呢啲我一定做足;至於打電話約食飯,我會留畀老公自己打,始終自己個仔打嚟梗係開心啲,而我要老公約,係避免佢有「下下管住我個仔」嘅錯覺,我一定唔會咁做。

 

表現殷勤
俗語有話「無事獻殷勤」我就唔係咁睇,我覺得殷勤都係基本禮貌嘅一種,好似明知我煮飯一般,次次去到佢屋企,我都會主動幫手。唔使我幫手係一件事,我繞埋雙手等食飯又係另一回事,多口問句,喺心目中又會無形加分,何樂而不為?

 

奉陪到底
屋企食飯,食完飯當然要主動幫手洗碗,呢件事我一定做,因為一星期去得老爺屋企一次,洗個碗真係好容易,呢個時間亦可以畀足住老公傾偈。

 

到洗完碗,我哋通常坐喺度一齊hea、一齊睇下電視咁,一定唔可以畀覺得我哋食完個飯就趕住走。我同老公通常會坐到 11 點幾先走,反正無下場,坐多一陣,晏啲返到屋企直接上床瞓覺。

 

 

節日送禮
所有大時大節,特別係中式節日,我都堅持會送禮畀老爺。講真平時佢哋拜神嗰啲嘢我已經唔多參與,過時過節點都要表示下。

 

有朋友覺得我做嘅嘢係虛偽、好假,不過我絕對唔同意。尊重,係要由心而發,因為女人係好敏感,丁點作狀都好容易識穿。

 

而當愛錫仔仔,佢嘅想法都會同我一樣,好想一家人和睦相處,好想對方對仔仔 / 老公好啲。

 

其實最核心嘅就係自己同老公嘅關係,呢方面就要靠自己造化了。