各位爸爸媽媽留意啦！一年一度嘅親子創科盛事「創新科技嘉年華2026」將於10月24日至11月1日一連9日喺香港科學園盛大舉行。今年以「創科領航 夢想高飛」為主題，不但有超過150場免費創科工作坊畀小朋友動手玩，仲特設「航天專區」展示香港參與國家航天任務嘅科研成果。全部活動費用全免，部分工作坊仲可以即場報名，絕對係今個秋天最抵玩嘅親子好去處！
航天熱潮殺到！小朋友化身小小太空人
今年嘉年華最大亮點，肯定係特設嘅「航天專區」。事關香港首位載荷專家黎家盈博士今年5月參與國家太空任務，證明香港人嘅航天夢絕對唔係遙不可及。專區將會展示本地大學嘅航天相關科研成果，包括由科技大學牽頭研發、喺天宮太空站運作嘅溫室氣體監測儀「MUSICO」，等小朋友可以近距離了解香港對國家航天任務嘅貢獻。
對於一眾航天迷嚟講，呢個專區絕對可以話係「打卡聖地」。家長可以趁機同小朋友講解太空探索嘅奧秘，話唔定下一個太空人就係你嘅寶貝仔女！
150場工作坊任揀 動靜皆宜啱晒唔同年齡
講到親子活動，又點少得動手做嘅工作坊？今年嘉年華提供約150場創科工作坊，涵蓋唔同主題同年齡層，總有一款啱你小朋友。
動感之選：磁力過山車
想挑戰刺激感？「極速挑戰：磁力過山車」畀小朋友化身遊樂園設計師，利用磁力驅動小車挑戰360度環形軌道，邊玩邊學磁力同力學原理。呢個工作坊適合小一至小三嘅小朋友，保證玩到唔捨得走！
科學之選：DIY香水實驗室
鍾意靚靚嘅小朋友就唔可以錯過「DIY香水實驗室」！親手調製清新蘋果綠茶香水，從中探索液體密度與分層現象，將科學知識同創意手作完美結合。整完仲可以帶走自己嘅製成品，夠晒滿足感。
未來之選：四輪掃地機器人
想小朋友認識智能家電？「四輪掃地機器人」工作坊畀佢哋親手組裝掃地機械人，從中認識齒輪傳動、馬達電路等工程知識，體驗做個小小工程師嘅樂趣。
其他精選工作坊仲有「DNA偵探—植物基因提取實驗」、「黑夜守護者：DIY手電筒」、「點水成冰—魔幻結晶實驗」等，涵蓋物理、化學、生物同工程各個範疇。
報名攻略話你知 周末現場名額有限
各位家長最關心嘅報名方法，記者幫大家整理咗懶人包：
網上報名：即日起可以喺活動網站innocarnival.hk註冊及激活帳戶，即日起接受網上報名。留意要註冊新帳戶，因為2025年嘅帳戶資料已經銷毀。
現場報名：星期六、日舉行嘅實體親子工作坊會預留少量名額畀大家即場報名。現場報名喺當日早上9時45分開始，地點係香港科學園二期10W大樓2樓。提提你，每位排隊人士每次最多可以為3位參加者報名同日最多兩節活動，名額有限，先到先得。
網上講座：如果搶唔到實體工作坊都唔緊要，仲有約15場由傑出學者同業界專業人士主講嘅網上講座，內容涵蓋航天工程、人工智能、氣象同醫療等主題。就算網上報名滿咗，都可以喺活動當日透過InnoCarnival YouTube頻道免費收看直播。
互動遊戲＋電子印章 集齊換限定紀念品
除咗工作坊，嘉年華仲有超過40個合作夥伴設置嘅展覽攤位，部分設有互動遊戲，等大人小朋友可以同科技互動，以趣味方式學習創科知識。
今年仲增設電子印章收集活動！參加者喺嘉年華期間掃描科學園各處隱藏嘅二維碼，集齊全部電子印章即有機會換領限定紀念品。周末日子完成任務仲可以換埋雪糕，紀念品同雪糕數量有限，換完即止。
周末下午仲有驚喜！本地動畫偵探冒險電影《大偵探福爾摩斯》嘅主角福爾摩斯同華生會現身會場，記得把握機會同佢哋合照。
交通攻略：免費穿梭巴士新增元朗將軍澳路線
去科學園咁遠，交通會唔會好麻煩？大會貼心安排咗免費穿梭巴士服務，往返香港科學園至各區，包括港鐵大學站、大圍站、九龍塘站、金鐘站，今年仲新增元朗站同將軍澳站路線，方便新界西同將軍澳嘅家庭。不過提提大家，穿梭巴士唔設包車或預留位置，座位有限，先到先得。
開放時間：
- 星期六、日及公眾假期：上午10時至下午6時
- 星期一至五：上午10時至下午5時
活動地點：香港科學園
各位爸爸媽媽，今個10月尾至11月頭，一於帶埋小朋友去科學園放電兼學嘢啦！記得mark實報名時間，快手搶飛呀！