7個乾鞋法｜香港最近連日落大雨，返工返學途中，就算擔遮都難免整濕對鞋襪。返到公司或學校，對腳又痕又臭，仲要焗足全日，真係好難頂！唔想畀濕鞋影響心情同健康？家事達人參考戶外品牌North Face分享嘅7個鞋履速乾法，幫你快速還原一對乾爽舒適嘅鞋，告別尷尬「臭腳」！
濕鞋唔處理 誘發3大後果
好多人都覺得「對鞋濕啫，陣間自己會乾」。但其實穿著濕透嘅鞋長時間返工返學，足部長時間處於潮濕環境，好容易引發以下腳部問題：
香港腳（足癬）：潮濕係真菌嘅溫床，容易令腳趾間痕癢、甩皮、發炎。
灰指甲（甲癬）：真菌感染指甲，令指甲變黃、變厚、變形，甚至發出異味。
趾間水泡：濕咗嘅鞋增加皮膚與鞋內摩擦，好易磨出水泡，行路痛不欲生。
所以，雨天返到室內，第一時間就要處理濕鞋，唔好等！
North Face 7個乾鞋法
以下7個方法可以根據你手邊嘅工具同鞋子材質靈活選擇：
乾鞋法1：用風筒吹乾
- 揀中等溫度同風速，避免高溫，尤其係皮鞋、麂皮鞋。
- 風筒同鞋面保持適當距離，要不停移動，唔好集中一點吹。
- 每次吹約15至30分鐘就夠，視乎鞋嘅濕度同材質。
乾鞋法2：塞報紙或廚房紙巾
- 將報紙或廚房紙搓成球狀，塞滿成隻鞋，特別係鞋頭位置。
- 紙張濕透後要即時更換，換到鞋內不再潮濕為止。
- 將鞋放在通風良好嘅地方，加快水分揮發。
乾鞋法3：鞋底墊報紙或用筷子架高
- 皮鞋、皮底鞋會吸水，最好喺鞋底墊幾層報紙吸濕。
- 或者用筷子、鉛筆等將鞋底架高，令空氣可以流通，加快鞋底乾燥。
- 運動鞋底多數係橡膠， 有坑紋通風，可以唔使咁做。
乾鞋法4：將鞋「立起」晾乾
- 將鞋垂直立起，減少鞋底與地面接觸面積，避免濕氣回滲。
- 同時確保鞋身唔會跌低，保持通風。
乾鞋法5：用小蘇打粉除濕除臭
- 小蘇打粉可吸濕兼中和異味。將小蘇打粉裝入舊襪或紗布袋，塞入鞋內。
- 放一晚之後，倒出粉末，就會發現臭味明顯減少。
乾鞋法6：放入乾燥劑或除濕劑
- 鞋內殘留水分，可以用平時買鞋盒入面嗰啲乾燥劑（硅膠粒），或者家用除濕包。
- 塞入鞋內幾個鐘，確保徹底乾爽。
乾鞋法7：用泡完的咖啡渣
- 咖啡渣含豐富碳元素，可以吸附異味分子。
- 將**乾咗嘅咖啡渣放入舊襪或茶包袋，再塞入鞋內過夜，有效中和臭味，仲有淡淡咖啡香。
鞋子被雨淋濕，要唔要洗？
呢個問題要視情況而定：
- 輕微濕、冇污漬：只需放通風處自然風乾，唔使特登洗。
- 濕透或有污漬：建議清洗。布鞋、波鞋可用溫和清潔劑加軟毛刷輕輕擦洗，再放陰涼通風處晾乾。皮鞋則用濕布輕抹表面，切忌陽光直射或高溫吹乾，以免皮革龜裂。
原文出處：按此