金"毛"公園散散步

星期日老公放假,提議同2個仔去行下細細口中既金‘毛’(佢想講金門)。金門係三藩市一大地標,同金門橋一樣咁出名的,假日或好天既時候特別多人。住S.F.十幾年,都真係第一次日頭行呢個

 

點解話日頭呢? 事關岩岩黎S.F.既時候,10幾歲,我地好鐘意幾個朋友深夜渣車入呢個探險!嘿嘿~ (做咩講講下講左鬼故架? 唔理喇講開又講埋啦haha)話說呢個都幾多鬼怪傳聞,例如話池塘果邊半夜有濕身女人行黎行去,因為當年佢同個仔比人追,唔小心跌落去浸瓜左;又話如果半夜衝左STOP sign,會有騎警發張已經唔會再用既舊告票比你;再來就係19街個紅綠燈位會有人亂過馬路但睇清楚根本無人... 咁呢個夜晚確實恐怖既!因為佢好多地方都無街燈,黑得可憐,好多樹林,仲要超勁大,又多掘頭路喎!兜兜下好似出唔返去咁。無錯,果時細個,鐘意找尋刺激,此處就岩晒我地成班V哇鬼叫喇!

 

好喇,講完D驚驚野,講返我地果日去金門行(係咪9唔搭8呢) 我地本身都好鐘意戶外活動,可能係咁,2個仔都好鐘意大自然。花草樹木,泥土小昆蟲,佢地都好有心機四圍睇同研究,又鐘意睇螞蟻軍隊,可以睇好耐。果日我地行左2個鐘,行入D樹林,上落斜又轉彎,亂行既感覺真好,有探險feel。

 

1

2 3

4

 

 

之後又見到大水牛,松鼠,綄熊,鴨群等,行程都幾豐富。2個仔算幾行得,係臨上返車先嗌累,老公話等佢地行多排慣左,可以帶佢地去hiking,仲多野睇喎!

 

5

6

7