advertisement

所謂 like father, like son ,睇小朋友性格,你大概可以 picture 到佢哋嘅父母係個點樣嘅人。有時同老公傾開其他小朋友嘅性格行為,會覺得其實父母們出多啲力教,小朋友就唔會有行為偏差。然後老公有句說話講得好啱的,佢話你睇下佢父母平時係點樣處事,其實佢哋教得好成功!

 

因為啲仔女真係學足,一樣的自私唔顧別人,一樣的最緊要唔好蝕底,所以你唔可以覺得人哋冇教,或者教得唔好,可能人哋就係想啲小朋友係咁樣,唔係個個同你一樣諗法。

 

呔媽專欄|家長自私小朋友有樣學樣

回心一想,佢又講得啱喎!我哋教小朋友要有禮貌,行出嚟大大方方,見人要叫人,所有嘢都要排隊,唔好爭先恐後,見到身邊人有需要就主動 offer 幫手,公共交通要讓坐,開門/坐升降機 要幫手 hold 住睇下仲有冇人出入等等,呢啲基本禮貌修養,可能響別人眼中,就係一句:戇居!

 

自此我都有呢個想法,唔好覺得人哋教得好唔好,只係睇下你想教出一個點樣嘅小朋友,自己滿意自己嘅小朋友就 OK 啦!講啲例子比大家聽下,冇話啱定錯嘅,就如啱啱所講,係睇你想小朋友變成一個點樣嘅人,父母自己睇得順眼就 OK,可能仲覺得自己小朋友咁樣先係叻,係醒目添!

 

例子一:事事都慌死蝕底

一班朋友去食晚飯,大人將一大疊碗傳開去,有個小朋友未到佢時,佢爭先搶左一 set 碗筷擺響自己前面。我見到,覺得咁樣好冇禮貌,因為呢個驚死蝕底嘅行為其實非常樣衰,如果係我啲仔我會覺得好丟臉,不過佢父母平時都係慌死蝕底嘅人,咁佢哋應該覺得自己小朋友好叻好醒目,識得一早 keep 定比自己唔驚冇份。

 

例子二:去人屋企又食又拎

朋友又提供左一個經典,佢邀請朋友們家中作客,小朋友一入屋就玩全線大搜查,摷晒啲玩具出嚟玩,走前當然唔會執拾。又唔問大人就自己開零食,仲要唔係食少少,係狂食!!

 

 

大人見到梗係話冇所謂,隨便吧, 小朋友係咁。但其實小朋友唔係咁的,只有冇家教嘅小朋友先會係咁。父母唔覺有問題,難怪小朋友咁放肆地侵略別人的家,食盡玩盡,臨走佢父母仲好意思開聲,立多幾包零食畀小朋友回程食,真係貪心又無品。朋友話自此一聽到想嚟屋企玩,都會捥拒,情願約出街gathering 算了。

 

其實大人唔做好榜樣,小朋友真係好難正常。唔好話呢啲特別情況,就以每日都發生嘅日常例子,好似推一道門咁簡單,我見好多人,大人又好小朋友又好,佢哋好鍾意響果兩秒間同時間競賽,趁你推住時佢哋即刻 zip 入嚟!仲一句唔該都冇!

 

呔媽專欄|家長自私小朋友有樣學樣

 

其實伸手推個門,有幾難?講句唔該晒,有幾難?呢啲咪又係冇家教,唔蝕底心態。當日常嘅嘢你事事出發點都只諗自己時,小朋友自然亦會以同樣心態成長,成個社會就愈來愈自私了。