advertisement

上星期有日放學,大仔好興奮同我講,佢一個女同學邀請佢星期日去佢屋企 play date,由上午10點到下午1點,其實就等於我地細個時候,去同學屋企玩。

呔媽專欄|呔仔第一次去女同學屋企play date

 

不過美國呢邊嘅play date,一般父母係擺底小朋友就走,夠鐘返去同學家接走。因此通常雙方家長有一定程度熟絡,先會set up play date的,亦因如此,大仔三年級先至第一次咁樣去同學屋企玩。

 

 

除咗我仔,女同學仲邀請咗另外2個同學仔,佢地呢4個班中最friend。對呢個第一次,大仔十分期待,之前一晚仲話好緊張。

 

 

到當日早上,細仔有點不捨阿哥,諗下原來咁多年來,除咗返學分開,weekend兩兄弟總是黐住玩,未試過咁樣分開過。望見細佬悶悶不樂,我就問細佬想唔想去?要唔要跟埋? 可能冇被邀請,加上同阿哥同學唔熟,最後都話唔跟了。

 

 

我地呢邊學校跟住址地區分配的,同學家都係附近鄰居,大仔同我講了地址,我就開車出發。結果摸門釘,又冇記低同學電話e-mail,我就估門牌調轉了,結果真係73號,大仔記錯37號,同一條街的,同學們一見到大仔已歡呼吶喊,叫佢快啲入屋。

 

 

由於我同呢個同學一家唔熟,始終不放心,第一次play date我就決定留低睇佢地玩。大仔初時覺得有點尷尬的,因其他兩同學嘅父母都走了,佢可能覺得我留低,搞到佢好baby咁。

 

乘機教仔(一):勿輕易相信陌生人

 

此時我又乘機教仔啦,話佢知我哋中國人有句話:害人之心不可有,防人之心不可無!即使佢話同學父母成日來學校做義工,好nice對小朋友好好,但我教佢凡事不能睇表面!好多變態殺人犯,搞小朋友的人,佢哋平日都係好好先生,鄰居都好驚訝佢地會犯罪。

 

就係了,人性嘅陰暗面唔會表露你面前,只有熟人親人先可以信任,仲要不是完全信任,要睇佢哋有無對你行為異常。大仔聽完,可能驚驚地,叫我都係留低陪佢好了。

 

 

 

同對方媽咪傾下計,整下嘢食,其實時間好快過。由於佢女係獨女,個個weekend都嗌悶,想有小朋友陪佢玩,因此之前成日會去附近朋友家玩,可惜朋友一家搬走了,阿女悶慌,就叫同學來家玩。

 

乘機教仔(二):珍惜兄弟情

 

事後我又教仔,叫佢珍惜自己有個同年紀細佬,唔係人人咁幸福有人由細到大陪伴成長的,大多獨生的小朋友都嗌悶,大人陪得幾多,就算陪玩,始終唔同小朋友有自己世界咁開心的。玩到中段,我返屋企拿籃球,細仔見我返來好雀躍,以為 play date完了,見我又走,有點失望。

 

 

結果佢想我帶埋佢去,佢想同阿哥一齊玩,不過一去到佢好怕醜,坐咗響廳睇電視,同埋食咗個burger lunch。由於本人吹水力特強,我差不多同佢媽咪傾到走果刻,哈哈!總算係了解多咗呢個家庭,背景各樣,下次可放心留仔響度play date,我哋兩公婆可以去嘆杯奶茶。