呔媽專欄#248|呔媽理財(下)理財三分法

呔媽理財下集理財三分法

上篇文章講及自己細個時候,全無儲錢觀念。小時錢來張手,大個自己搵錢,先開始學習儲蓄,其實都係遲。我哋細個搵到錢嘅觀念係,搵得嚟就使得去。今個月用晒,下個月又出糧,無謂嘢figure公仔,亂買化妝品一大堆,衫褲鞋襪未拆袋未剪牌,又買新。美其名係要獎勵自己努力工作,辛苦完要買嘢慰勞自己,但其實根本係自己唔識儲蓄。當時冇諗過咁大個人,係需要有儲蓄,未來嘅人生係會有好多用錢嘅地方,完全冇儲備,有起事上嚟要用錢,真係會好徬徨。

從小開始習慣儲蓄,對金錢有正確觀念,對我哋仔女於中學大學呢兩個最鍾意亂花父母錢嘅時期,係有莫大幫助!我已經聽到身邊朋友,有子女上高中讀大學嘅狀況,果種瘋狂花費嘅程度,真係以為父母識印銀紙,令我覺得必須好好教導自己兩個仔如何理財,學習儲蓄,打定個底。

開始教小朋友理財,我哋可以搵個時機,可能係佢生日,或者小學某年級開學時,同佢哋講定,開始會畀零用錢佢哋。而呢啲零用錢,唔係飯錢唔係要嚟開支的,係畀佢哋學習分為3份去打理呢筆錢。舉個例,家中有5歲仔及8歲仔,可以5歲仔就每星期畀5蚊佢,8歲果個畀8蚊,因為大啲嘅小朋友佢可能會需要多少少錢去買嘢,同埋咁樣可以公平啲,解釋到當你大一歲時,每星期又會多咗錢。當你5歲仔,每個月有20蚊零用,你就教佢分3份,而個分配比例我覺得最少要儲起一半或以上。

呔媽理財三分法:第一份 - 儲蓄

第一份係儲蓄。呢份係完全唔用嘅,係後備錢,一直儲一直儲,儲到咁上下,可以幫佢哋開個小童戶口,放入銀行,等佢哋見到自己嘅儲蓄愈來愈多。一般人心態係橫掂都冇,都儲唔到錢,用晒佢算數啦!但當你見到自己戶口愈嚟愈多錢,就唔會想無謂地花咗佢,咁樣比較容易養成儲蓄習慣,你知啦,中學生嚟講,4位數變3位數已經好大打擊㗎喇!而儲蓄呢一part,鼓勵佢哋將新年利是生日利是儲埋入去,見到啲數字突然狂升,好high㗎!教佢哋呢筆錢只會用於緊急或大事,同埋唔好畀其他人知道有呢筆錢嘅存在。

呔媽理財三分法:第二份 - 花費

第二份係可以花費嘅,儲到一個金額,你可能想用嚟買個筆袋,或者買個靚匙釦,隨你自己點用。往後你想要嘅嘢就要自己儲零用錢買,而唔係問父母要,當然亦可以儲起唔用。

呔媽理財三分法:第三份 - 慈善

第三份係用嚟慈善捐獻。當小朋友開始有零用錢,可以教佢哋分一啲去幫助別人,搵幾個可靠嘅慈善團體,等小朋友認識多啲社會上其他人嘅慘況,等佢知道自己身在福中,係件好事。呢個可以引導小朋友諗下,自己如果儲到10蚊,扣除花費同儲蓄,可以捐幾多錢去幫人? 捐款是自願的,但我覺得要有呢個愛心。

 

呔媽理財下集理財三分法

用呢個方式去教小朋友理財,簡單易明,小朋友會肯跟住做。到佢哋再大少少,高中或大學,需要出外食飯娛樂,可以出一張附屬卡畀佢哋,開始教佢哋點用Credit Card。其實用Credit Card都有學問,就係點樣可以先使未來錢,而又唔會畀銀行賺你一分一毫,呢個好重要!一定要教小朋友,碌卡前必須清楚自己係有錢交卡數,我只係唔想帶咁多現金出街,而唔係我碌咗卡先算,冇錢就個個月還最低還款,咁樣利疊利,銀行賺到笑。點樣可以唔蝕畀銀行,又有著數呢?就係響Cycle Period開始至中段碌卡喇!碌完唔使還住,有段Grace Period係可能2星期嘅,啲錢仲響你自己戶口未扣數,你咪賺咗銀行兩星期利息啦係咪?教就係要教小朋友,點樣可以利用唔同方式去賺錢,而唔係白白畀利息銀行,又或者畀佢罰late fee。

講到呢度,大家都要的起心肝,開始教小朋友理財,等佢哋知道儲錢唔係容易,辛苦儲起一筆錢就唔捨得亂花。有咗呢個概念,到佢哋遲啲同朋友去玩去花費時,點都有個譜,唔會洗腳唔抹腳。我哋就唔使做人肉ATM啦!哈哈!

advertisement